ဆရာလေးကိုပဲ အသည်းစွဲအောင်ချစ်မိပြီ(Complete)

Part 21

Unicode

"သက်ပိုင်ရေ မေမေတို့လာတယ်"

အိမ်ရှေ့မှ ကင်းစင်၏ အသံကြောင့် မီးဖိုထဲတွင် ဟင်းချက်နေရင်းမှ ဟင်းအိုးကို ခဏချကာ ဧည့်ခန်းထဲအမြန်သွားလိုက်သည်။ဒီနေ့က ကျောင်းပိတ်ရက်ဖြစ်သောကြောင့် သူကိုယ်တိုင်မီးဖိုချောင်ဝင်ဖြစ်သည်။ပုံမှန်ဆို ကင်းစင်ကသာ ချက်လေ့ရှိသော်လည်း ယခုက ‌မီးဖွားပြီးခါစမို့ အစစအရာရာ သာ၍ ဂရုစိုက်ရသည်။ကလေးကိုလည်း လမစေ့ပဲမွေးထားရသည်ကိုး။

"သား"

"ကင်းစင် မေမေတို့ကို တံခါးဝမှာ ရပ်ခိုင်းမထားနဲ့လေ"

"ဖေဖေ ထိုင်ပါဦး"

"အေးအေး သမီး"

သူတို့ အသီးသီး ဆိုဖာများပေါ်တွင်ထိုင် လိုက်ကြသည်။သူနှင့် ကင်းစင်အား ထိမ်းမြားပေးပြီးပြီးချင်းပင် သူတို့နှစ်ဦးသီးသန့်နေထိုင်ရန် နှစ်ဖက်မိဘများမှ အိမ်နှင့်ခြံအား လက်ဖွဲ့ခဲ့ကြသည်။သူကင်းစင်ကို အားနာသည်။သူကင်းစင်နှင့်လက်ထပ်ပြီးကတည်းက တစ်ကြိမ်တစ်ခါမျှ နှီးနှောခြင်းမပြုရသေးပေ။သူ၏ မြတ်လေးအပေါ်လိပ်ပြာမလုံမှုကြောင့် ထိုသို့လုပ်နေမိခြင်းဖြစ်သော်ငြား မိမိကိုယ်ကိုယ် ရွံစရာဟုခံစားရသည်။သူတော်ကောင်းယောင်ဆောင်နေသည့် နိမ့်ကျသည့်သူကဲ့သို့ပင်။ ထို့ကြောင့် အတတ်နိုင်ဆုံးခင်ပွန်းကောင်းဖြစ်ရန်ကြိုးစားသည်။လင်ယောက်ျားကဲ့သို့ မကြင်နာနိုင်ခဲ့လျှင်တောင်မှ ဘဝလက်တွဲဖော်တစ်ယောက်အဖြစ် ‌ရော၊သားလေးအတွက်ရောပါ အဖေကောင်းတစ်ယောက်ဖြစ်ရမည်ဟု ဆုံးဖြတ်ချက်ချထားသည်။

"‌သက်ညိုလေးကို ဒီကိုပေးပါဦး…အမလေး ဘွားမြေးလေး…ဘွားချစ်တုံးလေး…ဘွားရဲ့အသည်းအသက်အမြစ်ကလေး"

သူတို့သားလေးအား မွေးပြီးတစ်လပြည့်တွင် နာမည်ပေးခဲ့ကြသည်။သူ့နာမည်၏ နွေးသက်ကို ယူ၍ "နွေးသက်ညို" ဟုကင်းစင်
ကပင် ဦးဆောင်၍ ကင်ပွန်းတပ်ပေးခဲ့သည်။ကွယ်လွန်သားသူ သူမ၏ချစ်သူဇေလွန်းညို၏ နာမည်တစ်လုံးအား ထည့်မှည့်ခဲ့ခြင်းအပေါ်တွင်တော့ သူအနေနှင့် တစ်ခွန်းမျှ စောဒကမတက်ဖြစ်ခဲ့။သူက အပြစ်ရှိသူမဟုတ်လော။