Two Daddies and Me (Completed)

Chapter 16 - Fight

NAGKAKAGULO ANG mga estudyante ni Shane. Wala pa kasi ang guro kaya may kani-kaniyang grupo sa pag-iingay ang mga bata. Si Gab ay tahimik na nakaupo lang nang biglang lumapit sa kanya ang kaklaseng si John.

"My daddy told me that if you have two daddies, either one of them is gay or both are gays," diretsang sabi nito kay Gab na ikinagulat niya.

"My daddies are not gay!" protesta ni Gab.

"They are! And when you grow up, you will also become gay like your dads." Hindi nilubayan ni John ang kaklase. "That's what my daddy told me."

"No! You are lying. Your daddy is lying!" sumisigaw na si Gab. Tumayo pa ito at hinarap ang kaklase.

Nagtinginan na sa kanila ang iba pa nilang mga kaklase.

"I'm not lying," depensa ni John.

"Liar!" Biglang umigkas ang maliit na kanang kamao ni Gab at tumama sa kaliwang pisngi ng kaklase. Napaurong si John na muntik nang mawalan ng balanse nang dumapo ang suntok ni Gab. Nang makabuwelo ay sinugod nito si Gab at pinagsusuntok. Si Gab naman ang tipo na hindi rin basta magpapatalo. Ginantihan niya ng suntok rin ang bawat suntok ni John na dumadapo sa kanyang katawan. Nagpambuno na sa semento ang dalawang paslit samantalang nakamasid lamang ang kanilang mga kaklase.

Ito ang eksenang dinatnan ni Shane na lubhang nagulat sa nangyayari.

Agad niyang nilapitan ang dalawang nagsusuntukan at inawat. "John! Gab! Stop it!" Kasabay niyon ay sinikap niyang paghiwalayin ang dalawang estudyante. "Magsitigil kayo!" Mas malakas na ang sigaw ni Shane na ikinagulat ng lahat.

At saka lang tila natauhan sina John at Gab. Agad silang tumayo at humarap sa kanilang guro.

"He punched me on the face, Teacher Shane," umiiyak na sumbong ni John. Namumula ang pisngi nitong tinamaan ng suntok ni Gab.

Napako ang tingin ni Shane kay Gab na matapang na nagsalita, "Because he said that my daddies are gay. That I will also become gay when I grow up."

Nalipat ang tingin ng guro kay John. Ano ba ang nangyayari sa mga batang ito? Muli siyang nagsalita, "I don't want this to happen again. Tomorrow, when you come to school bring along your parents with you. I want to talk to them." Nasapo ni Shane ang tiyan niya na naramdaman niyang biglang sumakit. Kinabahan siya. Sobra ba siyang natensyon sa nangyari kaya biglang sumakit ang tiyan niya?

"Teacher, are you okay?" tanong ni Gab. Napansin niya ang paghawak ng guro sa tiyan nito.

"Yes, I'm okay." Nagpasya siyang maupo. Kinuha niya ang isang bote ng mineral water sa bag niya at uminom.

"Bakit n'yo po hinawakan ang tiyan n'yo kanina?" Nasa mata ng paslit ang pagtataka. "Does it hurt?"

"Sumipa lang siguro ang baby ko."

Nanlaki ang mga mata ni Gab. "There's a baby in your tummy?"

"Yes," sagot niya kasabay ang pagtango. Nagulat pa siya nang biglang magpalakpakan ang mga bata. Ang tensyon na nabuo kanina lang ay biglang nawala. Si John ay huminto na sa pag-iyak. "Class, please take your seat. John and Gab, mag-shake hands muna kayo bago kayo umupo."

Nagkatinginan ang dalawang bata. Nasa mukha ni John ang pag-aalinlangan. Napaurong pa nga ito nang kumilos si Gab at mag-umpisang lumapit sa kanya.

Inilahad ni Gab ang kanyang kanang kamay tanda ng pakikipagbati. Nag-aalangan pa rin si John nang abutin iyon at tuluyan na silang nag-shake hands.

"Huwag na kayong mag-aaway ulit, okay? Hindi magandang ugali ang pakikipag-away," paalala ng guro sa mga bata.

"Opo, Teacher Shane," sabay na sagot nina Gab at John.

Bago umuwi ang mga bata ay kinausap ni Shane ang mga yaya nina Gab at John. Sinabi niya sa mga ito ang nangyari at ibinilin na papuntahin bukas sa school ang magulang ng dalawang paslit.

"Yaya, do you think daddy Rob and daddy Pau will get mad at me because of what happened in school?" nag-aalalang tanong ni Gab. Ayaw niyang magalit sa kanya ang kanyang dalawang daddies.

"Hindi naman siguro," sagot ni Imelda. "Ipinagtanggol mo lang naman sila pati na rin ang sarili mo."

Tumango ang bata. "Yes, yaya."
***
"BOSS ROB..."

"O, bakit Imelda may problema ba?" salubong na tanong niya sa yaya ni Gab. Kararating lang nila ni Pau. "Si Gab, tulog na ba?"

"Maagang nakatulog si Gab. Eh, boss may pinasasabi 'yung teacher niya."

"Ano raw?" Si Pau ang sumagot.

"Gusto raw kayong makausap ni Teacher Shane. Kanina kasi, nakipag-away si Gab sa kaklase niya."

Napamulagat si Pau. Hindi rin makapaniwala si Rob sa narinig. "Anong nangyari?" sabay na tanong ng dalawa.

"Tinukso kasi siya ng isang kaklase niya. Na kaya raw dalawa ang daddy niya, kasi bakla raw ang isa o kayong dalawa."

Napanganga si Rob. Si Pau naman ay napatakip ang kanang kamay sa bibig.

"At sabi rin nung kaklase ni Gab, magiging bakla rin siya paglaki niya."

"Sinong kaklase 'yan?" tanong ni Pau.

"Si John," sagot ni Imelda.

"Kilala mo?" tanong ni Rob kay Pau.

Umiling ang tinanong. "Hindi."

"Ayun nga, pinatatawag kayo ni Teacher Shane. Pati na rin 'yung parents ni John."

"Ako na lang ang pupunta," pagboboluntaryo ni Pau. "Lagot sa akin ang John na 'yan."

"Papatulan mo pa 'yung bata," kontra ni Rob.

"Eh, 'di 'yung magulang niya. Lagot sa akin ang magulang niya."

"Sabi nga ni Gab, sumakit pa nga ang tiyan ni Teacher Shane kanina. Na-stress yata. Bawal pa naman sa kanyang ma-stress dahil buntis," muling pahayag ng yaya.

Nagkatinginan sina Rob at Pau. At muli, sabay silang nagsalita, "Buntis si Teacher Shane?"

"Boss, bakit ba kayo laging nagdu-duet?"

"Wala," pagbabalewala ni Pau sa tanong ni Imelda. "Matulog ka na. Hindi na kami kakain. Inaantok na rin kami."

"Patayin mo muna ang mga ilaw dito sa ibaba bago ka matulog," bilin ni Rob.

NAKAHIGA NA sina Rob at Pau ay si Shane pa rin ang pinag-uusapan nila.

"Buntis na si Shane. Naiisip mo ba ang naiisip ko?" tanong ni Rob habang nakatitig sa kisame.

Tumagilid sa pagkakahiga si Pau, paharap kay Rob. "Iniisip mo ba na hindi na kukunin sa atin ni Marlon si Gab dahil magkakaanak na sila ni Shane?"

"Posible," sagot niya habang hindi inaalis ang pagkakatitig sa kisame. "Pero, iniisip ko kasi kung si Marlon talaga ang ama ni Gab puwede pa rin niyang piliting makuha sa atin ang bata. Kaya naman nilang mag-alaga ng maraming anak."

"So, anong gagawin natin kung kukunin pa rin ni Marlon si Gab kahit na magkakaanak na silang mag-asawa?" tanong ni Pau kahit na sa isip niya'y desidido na siyang kausapin si Shane tungkol sa pagpipilit ni Marlon na alamin kung ito nga ba talaga ang tunay na ama ni Gab.

"Kikilos tayo depende sa kung anong ikikilos niya. Tatapatan natin ang bawat galaw niya. Sabi ko nga sa'yo, hindi niya makukuha si Gab sa napakadaling paraan," paniniguro pa ni Rob.

"Okay, sabi mo eh. O, siya matulog na tayo at kailangang maganda ako bukas sa paghaharap namin ni Shane at ng magulang ng atribidang batang 'yun." Umayos na sa pagkakahiga niya si Pau kasabay ang isang makahulugang ngiti.

Ngiti ng tagumpay.