Oops! This image does not follow our content guidelines. To continue publishing, please remove it or upload a different image.
───────────── ✦ ✾ ✿ KALABIT NG KAMATAYAN ✿ ✾✦ ─────────────
Aking narinig, sa gitna ng kasiyahan Yabag ng paa, senyas ng kaguluhan Dumating sa harapan, imahe ng kaligtasan "Pulis," isang mapanlinlang na pangalan
Ang ugat ng gusot ay patuloy na yumabong Sigaw ng poot, 'di marunong umurong Saan na ba ako pipitas ng tulong? Kung siya mismo'y narito, katwira'y isinusulong
"Tama na, anak," marahan kong bulong Sinubukang pigilan, pagsibol ng sumpong Mainit na yakap, sa bisig siya'y ikinulong O Diyos ko, saan na ba 'to hahantong?
Titulo'y nakamit sa pangangako ng salita 'Alagad ng batas,' paglalarawan sa balita Ang kadakilaang sila mismo ang nagpinta Binalot ng itim na usok, dangal ay 'di na makita
Boses ng bata'y biglang nagpakilala "Pulis aking tatay," ipinagmamalaking dakila Kaawa-awa, siya'y lumaki sa gusot na paniniwala Bulag sa tama, mulat sa maling akala
Hindi napigilan, bata ay kinantahan Isang sikat na ritmo, naging hudyat ng katapusan Bala ng baril, sunod-sunod niyang pinakawalan Natapos ang hidwaan sa paggawa ng kasalanan
Sa huling sandali, nais kong hagkan Aking anak, patawad, 'di kita naprotektahan Sa huling sandali, nasaan ang katarungan? Sa bayang ito, sino na ba ang dapat pagkatiwalaan?
'Masaklap na kapalaran, aming nakamtan, nang siya'y tumugon sa kalabit ng kamatayan'
