Oops! This image does not follow our content guidelines. To continue publishing, please remove it or upload a different image.
─────────────────────── ✦ ✾ ✿ ANG HULING PAKIUSAP SA AKING UNANG PANGUNGUSAP ✿ ✾✦ ────────────────────────
Isang araw, nagtangkang lumikha ng bagong simula Akala'y madali, unang hakbang ay isinawalang bahala Doon ko muling naalala, ngiti na mistulang paalala Kasama ng mapait mong paalam na hindi mabura sa alaala
Ako'y ibinalik ng panulat sa nagtapos nating kuwento Kung saan ikaw at ako ang tauhan sa ating munting teksto Isang pahina sa dulo, kung saan tayo tuluyang huminto Isang kabanatang nagsara sa nakaraan nating konsepto
Kaakibat ng 'noon' ang pagsisimula ng bawat 'ngayon' Subalit narito pa rin ang tanong, "Bakit nagkagano'n?" Nang ako'y iyong talikuran, nanatili pa rin sa 'king posisyon Hiniling na ako'y balikan, hiniling na ikaw ay lumingon
Hindi ka tumugon sa sigaw na aking pinakawalan Ikaw ay nagpatuloy, nilisan ang binuong tahanan Mula rito'y tanaw ko, gumuho ang ating pagmamahalan Paa ko'y 'di makagalaw, ipinako kung saan mo ako iniwanan
Ngayon, paano ko isusulat ang bagong simula? Kung ako'y narito pa rin sa huling bahagi at 'di makawala Siguro'y oras na para tuldukan ang ating mga alaala Nang makausad na, bagong simula'y akin nang makilala
Sa pagbukas ng pinto, sa likod, ako'y sumulyap Bago tuluyang humakbang, katapusa'y buong pusong tinanggap Siguro'y ako'y uusad nang wasak, walang pagpapanggap Sisimulan ang panibagong kwento sa piraso ng isang pangungusap
"Pakiusap, kung tayo'y muling maghaharap sa hinaharap, 'wag ka nang sumulyap," iyon ang huling pakiusap sa aking unang pangungusap.
