Oops! This image does not follow our content guidelines. To continue publishing, please remove it or upload a different image.
─────────────────────── ✦ ✾ ✿ ANG NAPUNDING ILAW NG ALITAPTAP ✿ ✾✦ ───────────────────────
Isang inosenteng pag-ibig, dalawang pusong nadawit Bituin sa'ting mata'y lumiyab nang sindihan ng galit Ikaw ay bumitaw, subalit ako'y patuloy na kumapit Sa gabi ng pagtatapos, ikaw sa aki'y ipinagkait
Hindi maaaring burahin, naitalang tadhana sa langit Hugis ng buwan ma'y magbago, umaga'y palaging sasapit Ika'y titingala sa puno, mga dahon ay maghahatid ng sakit Ako'y narito sa malapit, ngunit sa iyo'y 'di makakalapit
Lumipas na ang 'di mabilang na serye ng umaga't gabi Patuloy ang 'yong pagguho, ang paggapos sa sarili Paano ko ba ipapakita na ako'y narito sa bawat sandali? Kung ako ang ugat ng poot, pangalang ayaw sambitin ng labi
Sugat mo'y pinadurugo nitong oras na manhid Ikinandadong alaala na ako mismo ang naghatid Sa iyo'y nais tumawid, nais ayusin ang taling napatid Kailan mo ba mapapansin ang liwanag na umaaligid?
Anuman ang maging hugis ng puso, ako sa iyo'y susunod Saanman dalhin ng panahon, gumawa man ito ng bakod Ilaw ko'y mananatili hanggang galit mo ay mapagod Ika'y 'di hahayaang malunod, ako man sa iyo'y nakabukod
Marahil ako ang natapakang bitag, ang kulungang dapat burahin Iba ang 'yong liwanag, ang magpapalaya sa'yong damdamin Siya ang dapat mong mahalin, ako ang kailangang palayain Subalit ikaw pa rin ang aking huling inibig, iniibig, at iibigin
Sa wakas, mga bulaklak sa puno'y tuluyang namukadkad Ika'y buo na, isang bagay na lamang ang tanging hangad Ito na ang ating dulo, ang paglaya ng nakakuyom na palad Hiling ay natupad nang iyong tanggapin ang nahuling "patawad"
"Sa huling sandali, iyong nasaksihan ang napunding ilaw ng alitaptap. Ito ang kumukuti-kutitap na paalam, ang hindi naibigay ng aking yakap."
