Oops! This image does not follow our content guidelines. To continue publishing, please remove it or upload a different image.
──────── ✦ ✾ ✿ DAPIT-HAPON ✿ ✾✦ ───────
Tayo'y narito sa oras ng tagpuan Marahang uupo sa berdeng sapin ng damuhan Unti-unting ngingiti sa hangin ng katahimikan Ating pagmamasdan, pinintang kahel ng kalangitan
'Ikaw at ako,' iyon ang ating mundo Haligi ng pagkakaibigan, sabay nating binuo Daliri ng pangako, walang dapat na magbago Ika'y kaibigan, ganoon din ako sa'yo
Ginintuang tanawin, ating tinitingala Papalubog na araw, handa nang magsimula Sa paglingon sa'yo, natakot sa sinumpaang salita Bakit ganito? Ikaw ang nais kong makita
Sa pintig na dulot ng 'yong ngiti sa akin, Sa pagkinang ng mata mo'y naakit ang bawal na damdamin Ang init ng palad mo'y kaya na akong tunawin Sigaw ng puso ko, huwag ko sanang dinggin
Salitang kaibigan, ayaw kong gumuho Ang 'at' sa pagitan natin, ayaw kong maglaho Sa nararamdamang ito, gusto ko nang lumayo Sapagkat alam ko, mawawasak ang 'ikaw at ako'
Kung ikaw ba'y aking tatanungin Pag-ibig ko ba ay tatanggapin? Kung sakaling ako ay umamin Kaya mo ba akong mahalin?
Sagot na mula sa iyo'y kinatatakutan ko Takot na mawala, lahat ng mayroon tayo Ngunit 'di na mapipigilan, tibok ng puso ko Handa nang sumugal para sa salitang 'tayo'
Dapit-hapong sabay nating pinagsaluhan Araw na lumubog sa ating kanluran Ako'y naniwala sa walang-hanggang katapusan Subalit sa pagkakataong ito, pagkakaibigan nati'y tutuldukan
'Sa pagtatapos ng dapit-hapon, salitang kaibigan, tuluyan ko nang itinapon'
