Ουπς! Αυτή η εικόνα δεν ακολουθεί τους κανόνες περιεχομένου. Για να συνεχίσεις με την δημοσίευση, παρακαλώ αφαίρεσε την ή ανέβασε διαφορετική εικόνα.
─────────────── ✦ ✾ ✿ LIHAM NG TAGLAGAS ✿ ✾✦ ───────────────
Hindi na mabilang ang tagsibol na dumaan Maraming taglagas na rin ang naranasan Subalit narito pa rin sa sulong ang 'yong pangalan Sa labas ng sobre na patuloy kong iniingatan
Namukadkad na bulaklak, hudyat ng 'yong pagdating Halimuyak ng pag-ibig, siyang aking nakapiling Makasariling hangarin, sa aking mata'y pumuwing Nais kang maging akin, 'yon ang sumibol kong hiling
Sikretong nagtanim, mga salitang 'di kayang aminin Sa pirasong papel, inilatag ang tumubong damdamin Ito'y isang lihim ngunit araw-araw kong kikilalanin Patuloy na kikimkimin, patuloy kong payayabungin
Sa labas ng bintana'y sumipol, banayad na hangin Ika'y nakatingin sa puno ng malawak kong hardin Sa daang puno ng mga dahon, liham sayo'y dadalhin Dilaw, kahel, kayumanggi, kulay na bumuo sa 'king pagtingin
Sa kada hakbang, naglalaro ang kaba at kasabikan Isinulat na damdamin, tunay nitong kahulugan Sa wakas, iyong tugon, akin na ring mapakikinggan Subalit pagdating sa'yo, kasagutan ay aking nasaksihan
Sumilay ang isang ngiti sa'yong mapupulang labi Sa puntong 'yon, siya ang nakasungkit, ako ang nahuli Ang sobreng nakalaan sa iyo, tuluyang nawalan ng silbi Sagot mo'y akin nang batid, ako'y hindi iyong pinili
Suot ang wasak na puso, sinubukan kong tumakas Panahon ang nagbaon nitong liham ng taglagas Siguro'y ako'y nalinlang, naniwalang may takdang oras Ngayon, ang aking hinintay, may sarili ng wakas
"Walang tamang panahon ang makapagbibigay ng kasiguraduhan. Hindi lahat ng paghihintay, tamang tao ang paglalaanan."
