Oops! This image does not follow our content guidelines. To continue publishing, please remove it or upload a different image.
─────────────── ✦ ✾ ✿ LIHIM NG TAGSIBOL ✿ ✾✦ ───────────────
Isang "balang araw" ang aking binalikan sa kasalukuyan Isang sikretong pinayabong ng makulay na kapanahunan Maaliwalas, mahalimuyak, pag-ibig na noo'y iningat-ingatan Dalawang pusong nag-iibigan, subalit 'di pinagbigyan
Mapait ang iyong ngiti nang iabot ang liham ng taglagas Suot mo ang pagsisisi sapagkat hindi ikaw ang aking wakas Paano ko ba sasabihin na tayo'y talunan sa laro ng oras? Na minsa'y ikaw ang tinatangi, ang may-ari ng damdaming wagas
Batid ko ang sabay na pintig na noo'y nais kong makamtan Ako'y umupo sa iyong tabi, nag-asam ng iyong katapatan Sa loob ng hardin, itinanim mong puno'y patuloy kong pinagmasdan Matiyagang naghintay, lihim na pagtingi'y nais kong malaman
Paano ko ipagsisigawan na ako'y iyo ring sinisinta? Kung pagtingi'y walang ebidensya ng mahiwagang dal'wang salita Sikreto ko sana'y mabubunyag, bituin sa mata'y may nais ipakita Kung hinayaan ang damdamin, hindi "tamang pahanon," ang magsalita
Maniwala ka, aking hinintay na magtapos ang 'yong paghihintay Subalit ang tamang panahon nati'y tiyak, hindi kayang ibigay Ang masiglang kulay ng panahon, biglang binalot ng lumbay Aking sinta, hanggang dito na lang ang aking pagsubaybay
Iniibig kong tagsibol, dahon sa sanga'y unti-unti nang nalagas Dumating na ang taglagas, pagbitaw ang handog ng ating bukas Siya'y dumating, sa hardin ng paghihintay, ako'y itinakas Sa dating wagas, paalam, pag-ibig ko'y dito na magwawakas
"Sa liham ng taglagas na pinaglipasan ng panahon, ito ang lihim ng tagsibol, ang aking nahulingtugon."
