Oops! Ang larawang ito ay hindi sumusunod sa aming mga alituntunin sa nilalaman. Upang magpatuloy sa pag-publish, subukan itong alisin o mag-upload ng bago.
──────────── ✦ ✾ ✿ PINTOR NG BAHAGHARI ✿ ✾✦ ────────────
Araw ay nakatungo rito sa kalupaan Ito'y nanonood, payapang kalangitan Mata'y ipinikit para maglakbay sa nakaraan Sarili'y tumakbo, pabaliktad sa orasan
Malinaw na nakapinta, nakangiti mong larawan Mainit na haplos mo'y nakatatak sa katawan Ang bawat salita mo'y nakaukit sa isipan Alaalang regalo mo'y kailanma'y 'di malilimutan
Minsa'y iyong sinabi, "Huwag mo akong iwanan" Aking Ama, ako'y naririto, kamay mo'y hahawakan Ngunit tali ng sumpaa'y napatid nang biglaan Ako'y iyong iniwan, ako'y tuluyang binitawan
Sa aking pagtapak sa inaasam na entablado Kwintas ng karangalan, nais kong isabit mo Bawat kabanata ng buhay, nais kong subaybayan mo Subalit paano? Tadhana'ng naglibing sa pangalan mo
Mata'y iminulat sa tunay na reyalidad Sa hinaharap na 'di tiyak at walang seguridad Sa natitirang pahina, kahit pangalan mo'y 'di nakasaad Sana'y samahan mo, saanman ako mapadpad
Ngayo'y naglakbay muli pabalik sa kasalukuyan Tiningalang kalangitan, binalot ng kadiliman Unti-unting bumuhos, umiyak ang kaulapan Sa likod nito'y ngingiti kahit puso'y luhaan
Sa madilim na kataasan, ikaw ay nananahan Sa putikang kalupaan, ikaw ay nagmamanman Ika'y sisilip sa katapusan ng kwento ng ulan Makulay na obra mo'y pahiwatig, ikaw nga'y nariyan
'Ikaw ang pintor ng bahaghari, ang papawi sa pighati at magbibigay-kulay sa nasirang ngiti.'
