Oops! This image does not follow our content guidelines. To continue publishing, please remove it or upload a different image.
─────────────── ✦ ✾ ✿ KWENTO NG MANLALAKBAY ✿ ✾✦ ───────────────
Heto na naman, ako'y naglalakad Panibagong simula, aking hinahangad Daplis ng init, pakiramdam na walang katulad Liwanag ng araw, sa silanga'y handa nang mamukadkad
Sa bawat paghakbang, suot ang katatagan Disyerto ng pagsubok, aking lalagpasan Sa buhanging nilalakaran, kakapit ang talampakan Hindi titigil, manuyo man ang aking lalamunan
Ngayo'y narating ang payapang dalampasigan Gumawa ng musika ang hangin ng katahimikan Ritmo ng alon, direksyon ng kapalaran Sakay ng bangka, patungo sa 'king paroroonan
Bahagyang tumigil sa gitna ng karagatan Unti-unting dumilim, maputing kaulapan Bagyo ng pagsusulit, sinubukan akong hadlangan Ngunit muling ngumiti, mabait na kalangitan
Bitbit ang katapangan, narating ang kalupaan Biyahe sa tubig, matagumpay kong nalagpasan Ngayo'y kumakaway, kakahuyan sa 'king harapan Oras na para tahakin, nakakalitong kagubatan
Sa aking pagpasok, sarili'y pinakiramdaman Nais magpahinga nitong pagod na katawan Sa ilalim ng puno, sa kahoy na sinandalan Sa paghuni ng ibon, nagpasalamat sa kalikasan
Paghampas ng hangin, taas-noo kong dadamhin Mapuwing man, daang pataas, aking tatahakin Hindi susuko sa pag-akyat nitong bulubundukin Patungo sa tuktok, patuloy akong mananalangin
Sa wakas, inaasam na dulo, nagawa kong akyatin Ang pagod, paghihirap, nagawa kong talunin Minimithing katapusan, ito ang magandang tanawin Ang tagumpay na nakamtan, ito'y sariling akin
"Ito ang kwento ng isang manlalakbay. Walang humpay na nagpapatuloy upang marating ang tagumpay."
