Oops! This image does not follow our content guidelines. To continue publishing, please remove it or upload a different image.
───────────── ✦ ✾ ✿ HILING SA BULALAKAW ✿ ✾✦ ─────────────
Sa aking pagpikit, dinama ang kalamigan Simoy ng hangin, gabi ng katahimikan Sa ilalim ng buwan, nais kong masilayan Ang kahapong sinubaybayan ng kalangitan
Mistulang bituin sa gitna ng kaguluhan Natatanging liwanag, bida sa kadiliman Bakanteng espasyo, nagkaro'n ng kabuluhan Isang kagustuhan, sa dilim ay aking natagpuan
Lumapit sa iyo, ikaw ay aking nahagkan Puwang sa pagitan natin, tuluyan nang nawakasan Noo'y sigurado sa mahika ng walang-hanggan Ikaw at ako, inakalang walang katapusan
Nais mong hanapin, liwanag sa kawalan Munting pangarap para sa iyong pangalan Nais kang maningning, ika'y 'di pipigilan Sa kalawakang ito, kamay mo'y aking pakakawalan
Sa huling pagkakataon, bago mo 'ko talikuran Nagbitiw ng salita, pangakong 'di malilimutan Sa gabing iyon, gumawa ng sariling kapalaran "Balang araw, itutuloy ang pagmamahalan"
Mata'y iminulat sa sakit na naramdaman Luha'y pumatak, sa maitim na berdeng damuhan Sa gabing ito, yumakap muli ang ating nakaraan Ang inaasam na liwanag mo, wala na sa kasalukuyan
Sa ating pangako, ikaw ang unang bumitaw Ang minimithing pangarap, 'di na rin matatanaw Sa ginawang paghihintay, pighati ang lumitaw Sinumpaang pag-ibig, wala na ang 'ikaw'
Kalangita'y nanonood sa ginawang pagbalik-tanaw Sa ating pangakong kasabay mo pumanaw Sa aking pagtingala, atensyon ay napukaw Ipinikit ang mata sa pagbagsak ng isang ilaw
"Muli sanang mangyari ang ating balang araw, kung saan tayo at walang-hanggan ang magiging saklaw," 'yon ang aking hiling sa bulalakaw
