A Wife's Tears ( Completed )

Tenth Tears

"Primo! Anong ginagawa mo?!" sigaw na tanong sa kaniya ni Tito Simon.

Dahan-dahan kong tinanggal ang nakatakip kong kamay sa aking mukha. Tipid kong nginitian at tinanguan ang mag-asawa. Pinilit kong umakto na parang walang nangyari, kapag nagkataon baka malaman ng magulang ni Primo ang totoong estado ng pagsasama namin.

"Dad, bakit kayo narito?" naiiritang tanong ni Primo sa ama nito.

"Bakit masama bang bisitahin namin ang aming anak at manugang?" balik na tanong ni Tito Simon at binaling ang tingin sa akin.

"G-good evening po." Basag na boses kong bati sa mag-asawa. Naroon pa kasi ang kabang nararamdaman ko, iniiwasan kong manghinala ang mga ito sa amin.

"Good evening hija. Sinasaktan ka ba nitong anak namin?" tanong ni Tito Simon na nagpatulala sa akin.

"Dad, hindi ko siya sinasaktan," mahina ngunit may diin ang pagkasabi ni Primo. Siya ang sumagot para sa akin dahil napako ako sa aking kinatatayuan at hindi makapagsalita.

"Si Beatrice ang tinatanong ko at hindi ikaw!" malakas na sambit ni Tito Simon kay Primo na may kasamang panduduro.

"Come hija punta tayo ng kitchen," pagsabat ni Tita Amelia saka niya ako inakay. Naiwan ang mag-ama sa sala na masama ang tingin sa isa't isa.

"Ganyan ka ba namin pinalaki ng Mommy mo Primo ang manakit ng babae? Nakita mo bang sinaktan ko ang Mommy mo?" sunod-sunod na tanong ni Tito Simon. Nasa kusina na kami ni Tita Amelia ngunit naririnig pa rin namin ang bangayan ng mag-ama.

"Dad, ilang beses ko bang sasabihin na hindi ko nga sinasaktan ang asawa ko!" Dumagundong ang boses ni Primo sa buong mansion. Napaigtad ako dahil na rin sa takot. May phobia na yata ako sa tuwing sumisigaw ito.

"Hija, uminom ka muna ng tubig." Inabutan ako ni Tita Amelia ng isang basong tubig. "Namumutla ka, sinasaktan ka ba ni Primo?" malumanay na tanong sa akin ni Tita. Hindi ako nakasagot dahil umaligawgaw ang malakas na boses ni Tito.

"Napaka walang hiya mo talagang tao ka! Kailan ka pa natutong sigawan ako? Ngayon naman nagsisinungaling ka na rin sa amin. Kitang-kita namin ng Mommy mo na pinagbubuhatan mo ng kamay si Beatrice, ngayon sabihin mo sa akin na mali ang nakita namin," paghahamon na saad ni Tito Simon.

"Isipin niyo na ang gusto niyong isipin tutal hindi niyo naman pinapaniwalaan ang sinasabi ko. I'm done for this argument, Dad."

Akala ko natapos na ang pagtatalo ng mag-ama dahil tumahimik bigla ngunit hindi pala. Nakarinig ako ng sunod-sunod na yabag papalapit sa kinaroroonan namin ni Tita.

"Achoo!" Napabahing ako bigla dahil malayo pa lang naamoy na ng ilong ko ang amoy ni Primo.

"Primo! Talagang napaka bastos mong tao. Huwag mo akong tatalikuran kapag kinakausap pa kita!" galit na sabi ni Tito Simon. Nagtungo si Primo sa kusina na sinundan naman siya ni Tito. "Tutal nagkaharap-harap naman na tayo, gusto kong tanungin si Beatrice." Napatingin sa akin si Tito na lalong nagpanginig sa buong katawan ko. "Hija, umamin ka sa amin ng totoo. Sinasaktan ka ba ni Primo?" malumanay na tanong ni Tito.

"Sige na hija huwag kang matakot na magsabi sa amin ng katotohanan," pagsingit ni Tita Amelia nang mapatingin ako sa kaniya.

Nanigas ang katawan ko ng hindi ko inaasang pag-hapit ni Primo sa aking baywang. Makahulugan niya akong pinatitigan pinapahiwatig na kapag nagkamali ako ng isasagot mananagot ako sa kaniya.

"T-tito, Tita ang totoo po hindi ako sinasaktan ni Primo." Pinatatag ko ang aking pananalita kahit na nangangatog ang aking katawan.

"Mayroon lang kaming hindi pagkakaunawaan, away mag-asawa kaya hayaan niyo kaming ayusin ito," turan ni Primo na masama ang tingin sa akin. Ang mga mata nito ay tila nag-aapoy sa galit samantalang sa akin ay nagbabadya ang pagluha.