မင်းသည်သာ ကိုယ့်ရဲ့ မြတ်နိုးရာ [You are the cause of my Euphoria]

အပိုင်း ( ၁၀ )

" တရားမျှတ လွတ်လပ်ခြင်း နဲ့မသွေ၊တို့ ပြည်၊ တို့ မြေ၊
များလူ ခတ်သိမ်း ငြိမ်းချမ်းစေဖို့၊ခွင့်တူညီမျှ၊ ဝါဒဖြူစင်တဲ့ပြည်၊တို့ပြည်၊ တို့မြေ၊
ပြည်ထောင်စု အမွေ၊ အမြဲတည်တန့်စေ၊
အဓိဋ္ဌာန်ပြုပေ၊ ထိန်းသိမ်းစို့လေ။ "
-------
     ကျောင်း၏ assembly ကျင်းပရာကွင်းပြင်၌ အဖြူအစိမ်းဝတ်ထားသော ကျောင်းသား၊ကျောင်းသူများသည် နိုင်ငံတော်သီချင်း ''ကမ္ဘာမကျေ´´ကို ညီညာစွာသီဆိုနေသည့်မြင်ကွင်းသည် ရင်ကိုပင် လှုပ်ခတ်စေနိုင်သည့်အထိ နားဝင်ချိုဖွယ်ရာကောင်းလှသည်။ အထက်တန်းကျောင်းသားစုစုပေါင်း ၂၅၀၀ ကျော်ရှိသော ကျောင်းတွင် ကျောင်းသား/သူတို့၏ နိုင်ငံတော်သီချင်းသီဆိုသံသည် ပတ်ဝန်းကျင်တစ်ခုလုံးကိုပင် လွှမ်းခြုံသွားစေသည်။ ဆယ်တန်းပညာရေးစနစ်သည် အသက်ဝင်နေဆဲ ဖြစ်တာကြောင့် အထက်တန်းကျောင်းသားများသည် နောက်ဆုံးနှစ်ကျောင်းသားများ ဖြစ်သည့်အလျောက် မကြာခင်တွင် အဆင့်မြင့်ပညာကို သင်ရတော့မည်ဖြစ်သည်။ ထို့ကြောင့် ကျောင်းသားများသည် အားမာန်တက်ကြွနေသည့်အပြင် မြငရသူအပေါင်းကလည်း တက်သစ်စအဖူးလေးများ ပွင့်ဟသော ပန်းခင်းကြီးကို စောင့်နေရသကဲ့သို့ အလွန်ကို စိတ်လှုပ်ရှားဖွယ်ကောင်းလှသည်။

   ဆရာ၊ဆရာမများသည် assembly ကျင်းပရာ ကွင်း၏ ဘေးဖက်တွင် နေရာယူထားသည်။ တန်းခွဲအလိုက် တန်းစီးရသည် ဖြစ်ရာ တန်းခွဲ A သည် ညာဖက်ပထမဆုံးအတန်းဖြစ်နေလေသည်။ တန်းခွဲကိုယ်စားပြုများဖြစ်ကြသော အတန်းခေါင်းဆောင်၊ကျောင်းကောင်စီအဖွဲ့ဝင်များအပြင် မြတ်နှင့် ရှင်းလက်ျာလည်း အရှေ့ဆုံးအတန်းတွင် ရပ်နေကြသည်။ ဟန်နွေရာကမူ ဥက္ကာမင်းဟန်နှင့်အတူ အလယ်အလတ်နားတွင် ရပ်နေကြသည်။တီချယ်သက်က သူ့အား ပြုံးပြသည့်အခါမျိုး ခေါင်းစောင်းကြည့်သည်အခါမျိုး၌ မြတ်သည် အောက်နှုတ်ခမ်းကိုက်ကာ အပြုံးကို ထိန်းချုပ်နေရသည်။ မြတ်ရပ်နေသည့်နေရာသည် တီချယ်သက်အား တည့်တည့်မမြင်ရတာကြောင့် ဘေးက ရှင်းလက်ျာအား နေရာလဲပေးရန် တောင်းဆိုလိုက်သည်။

"ရှင်းလက်ျာ ငါ့ကို နေရာလဲပေးပါလား? ငါ အဲနေရာမှာ ရပ်ချင်လို့ "