Just The Strings (COMPLETED)

Kabanata 7

#JustTheStrings

Kabanata 7

Hindi agad ako nakagalaw dahil halos matumba si Saint sa pagtama nung bola sa ulo niya. Pakiramdam ko, naalog iyong utak niya dahil sa lakas nun!

"Oh, my God," hindi ko napigilang sabi. Hindi pa rin ako makagalaw at natirik lang ako sa kinatatayuan ko. Mukhang biglang nahilo sandali si Saint dahil sa nangyari. He seemed a bit disoriented at iyon ang dahilan kung bakit bigla akong nagising.

Agad kong hinawakan iyong ulo ni Saint.

"Ayos ka lang?" tanong ko kahit halata naman na hindi siya okay.

Hindi siya nakasagot. Mukhang hilo pa siya sa nangyari.

Busy ako sa pagcheck sa ulo niya kung may bukol ba siya o ano. Ang lakas kasi talaga nung pagtama ng bola sa ulo niya! Narinig ko pa 'yung tunog dahil sa lakas ng impact.

"Sorry." Napatingin ako sa nagsalita at bakit hindi na ako nagulat na si Parker 'yung bumato kay Saint? Kasunod niya sina Kuya at Kuya Benj at mukhang nagpipigil lang ng tawa si Kuya Benj dahil pulang-pula na 'yung mukha niya. Hindi ko alam kung ano ang problema nila kay Saint para matuwa pa sila. Halos matanggal na nga 'yung ulo ng tao dahil sa ginawa nila!

"Bakit mo ginawa 'yun, Parker?" kalmado kong tanong. Si Saint, nakahawak iyong mga daliri sa gilid ng ulo niya. Mukhang sobrang lakas ng pagkakasipa ni Parker kaya sobrang disoriented pa rin si Saint hanggang ngayon.

"Di ko naman sinasadya," sagot niya. Pinulot niya iyong bola at saka pinaglalaruan.

Huminga ako nang malalim. Kailangan kong kumalma dahil ayokong mainis. Hindi ko alam kung bakit iniinis ako ng mga lalaki sa paligid ko ngayong araw. Sinimulan ni Kuya tapos ngayon naman si Parker.

"Mukha bang goal 'yung ulo ni Saint? At saka nandun 'yung goal sa kabila," sabi ko at saka itinuro iyong goal na nasa kabilang banda ng field.

Bigla akong inakbayan ni Kuya.

"'Wag ka ng magalit, baby sis," sabi niya. "Oy, GDL. Tama na arte. Kala mo first time mo matamaan ng bola," sabi niya kay Saint.

Mukhang okay na si Saint dahil nakasagot na siya.

"E kung ikaw kaya batuhin ko," sabi ni Saint.

Tinawanan siya ni Kuya. "Ano? Maglelay-up ka sa ulo ko?" sabi niya tapos nagtawanan sila ni Kuya Benj tapos nag-appear pa sila. Grabe talaga bakit ang bully nila?

"Magsorry na nga lang kayo, Kuya," sabi ko dahil ayoko na mag-away pa sila sa harap ko. Gusto ko na lang matapos 'to dahil dadalhin ko pa si Saint sa clinic. Baka kasi kung ano ang nangyari dito. Medyo matagal siyang nahilo kaya medyo kinakabahan lang ako.

"Hindi naman namin sinasadya. Right, Parker?" sabi ni Kuya tapos siniko si Parker.

"Yeah," sagot ni Parker. "Next time, 'wag ka kasing humarang sa daan."

Napailing na lang ako. Bakit ba sobrang hirap magsorry para sa kanila?

Dahil alam ko na wala akong mapapala sa kanila at kahit umiyak ako sa harap nila sobrang labo na humingi sila ng tawad, hinawakan ko na lang si Saint sa braso para dalhin sa clinic. Nagsisimula na kaming maglakad nung harangin kami ni Kuya.

"Aba't," sabi ni Kuya. "Saan kayo pupunta?"

"Sa clinic," sagot ko.

"E bakit kailangan nakahawak ka sa kanya?"

"Baka kasi matumba siya. Ang lakas kasi ng tama ng bola," sabi ko tapos tinignan ko ng masama si Parker. Napailing na lang si Parker.

"Matanda na 'yan. Kaya niya maglakad mag-isa," sabi ni Kuya tapos inalis iyong kamay ko sa braso ni Saint. "Oy, GDL. Umayos ka. 'Wag kang breezy sa kapatid ko."