သူမတို့ အပြင်ထွက်လာချိန်မှာတော့ မသက်မသာခံစားနေရတဲ့ အခြားနှစ်ယောက်နဲ့ မတူဘဲ ရွှေရတီဦးကတော့ သူမအရှေ့မှ couple လိုဖြစ်နေတဲ့ မိန်းကလေးနှစ်ယောက်ကိုကြည့်ကာ အရမ်းတွေကျေနပ်နေတယ်။
ထိုသို့ ဖြစ်အောင် သူမက တမင်သက်သက် သွန်းနေခြည်ကို အဖြူရောင်ရှပ်နဲ့ ဂျင်းဘောင်းဘီကို မနည်းရှာကာ ရွေးပေးထားခြင်းပင်။
သူမမွေးနေ့လက်ဆောင်ပေးမယ်ဆိုတဲ့ ဖန်ဂေါ်လီတွေအများကြီး ထည့်ထားတဲ့ ဗူးကိုတောင် မေ့သွားတယ်။
သူမတို့ မနက်စာကို ကျောင်းနဲ့နီးတဲ့တစ်နေရာမှာဝင်စားလိုက်တယ်။ ရွှေရတီဦးကောင်းမှုနဲ့ သွန်းနေခြည်ရဲ့ ပိုက်ဆံအိတ်ထဲမှ သောင်းကဏန်းလောက် ခုန်ထွက်သွားတယ်။
ပြီးတော့ မွေးနေ့ရှင် သွန်းနေခြည်လိုချင်တာ တစ်ခုခု ဝယ်ဖို့ သူမတို့ မြို့ပတ်ကြတော့တယ်။
ဘာကြောင့်လဲဆိုတော့ သူမမှာ ဘာလုပ်မယ်ဆိုတဲ့ အစီအစဥ်လည်း သေချာမရှိလို့ဘဲ။ သူမ ပထမတွေးထားတဲ့ အစီအစဥ်ကလည်း ရွှေရတီဦး ကောင်းမှုနဲ့ ပျက်စီးသွားပီလေ။
ဒါကြောင့် သူမရဲ့ မွေးနေ့အတွက် သူမ မား ပေးထားတဲ့ ငွေကို သူမအသုံးချဖို့ဆုံးဖြတ်လိုက်တယ်။
သွန်းနေခြည်ရဲ့ အမေနဲ့ မားက မလာအားတာကြောင့် သူမကို မွေးနေ့လက်ဆောင်အဖြင့် တစ်ခုခု ဝယ်ရန် ပိုက်ဆံလွဲပေးလိုက်ခြင်းဖြစ်တယ်။
သူမတို့ နာရီဝက်လောက် လိုက်ပတ်ကြည့်ပြီးတာတောင် သွန်းနေခြည် လိုချင်တဲ့ ပစ္စည်း ဆိုင်မတွေ့ဘူး။
ဒါကြောင့် သူမတို့ရဲ့ ဦးတည်ချက်က စျေးကို ဖြစ်လာတယ်။သူမတို့ စျေးထဲဝင်လာပြီး အင်္ကျီဆိုင်တွေ၊ ဖန်စီဆိုင်တွေ၊ နာရီဆိုင်တွေ၊ လက်ဝက်လက်စားဆိုင်တွေ တစ်ခုပြီးတစ်ခုဝင်ကြည့်ကြတယ်။ ဒါပေမဲ့ သွန်းနေခြည်လိုချင်တာကို မတွေ့သေးဘူး။
လက်ဝတ်ရတနာတွေ ရောင်းတဲ့ ဆိုင်တစ်ခုရှေ့ရောက်ချိန်မှာတော့ သွန်းနေခြည် ရပ်လိုက်တယ်။