အန္တရာယ်ရှိသော စရိုက် - ဘာသာပြန်

Chapter 6- ဓား

Unicode

ကျိမင်ရွေ့ အလန့်တကြားနှင့် "မှုခင်းတပ်ဖွဲ့" ဟူသော စကားကိုသာ အထပ်ထပ် ရွတ်နေသည်။

ကျိမင်ရွေ့မှာ အခုမှ အလုပ်စဝင်သူဖြစ်၍ လူသတ်မှုများကိုင်တွယ်ရန် လူသတ်သမားများ ဖမ်းဆီးနိုင်သည့်အဆင့်အထိ မရောက်သေးသော်လဲ သူ့အိပ်မက်က မှုခင်းရဲတစ်ဦးသာ ဖြစ်၏။ သူ့ကိုယ်သူ မှုခင်းရဲတစ်ဦး ဖြစ်နိုင်သည်ဟု မမျှော်လင့်ရဲသေးပေမဲ့ပေါ့လေ။

အဆင့်မီသော ဖန်တစ်ဦးဖြစ်သည့် ရဲအရာရှိမှာ သူ့အိုင်ဒေါအကြောင်း ကောင်းမွန်စွာ သိသည်။
" ဟွားနန်မှာ ဖြစ်ခဲ့တဲ့ 7/19 လူသတ်မှု.. 9/02 ကွင်းဆက်လူသတ်မှု.. 3/10 အဆိပ်ခတ်လုပ်ကြံမှု အကုန်လုံးကို သူ ဖော်ထုတ်ခဲ့တာ"

အမှုအခင်းများအားလုံးမှာ နာမည်ကျော်ကြားသော အမှုများသာဖြစ်၏။ အလွန်ရက်စက်ကာ သဲလွန်စသိပ်မရှိသော အမှုက ပိုများသည်။

ကျိမင်ရွေ့က 'မိုက်လိုက်တာ' ဟူသော အမူအရာနှင့် နားထောင်နေရင်းနှင့်မှ တစ်စုံတစ်ခုကို သတိရသွားသည်။
" နေပါဦး.. အဲ့ဒီ့အမှုတွေအကုန်လုံးက လွန်ခဲ့တဲ့ ဆယ်နှစ်ကျော်က ဖြစ်ခဲ့တာတွေလေ"

သူ ပြောခဲ့သည့်အမှုတိုင်းက လွန်ခဲ့သော ဆယ်နှစ်မှ အမှုများသာဖြစ်လေသည်။

ကျိမင်ရွေ့က ရှဲ့လင်၏ကျောပြင်ကို ငေးကြည့်နေသည်။ ထိုသူမှာ ဆုရှောင်းလန် မကိုင်ရဲပဲ ချထားသည့် ‌‌သွေးများ အသားများကို ရှင်းလင်းနေဆဲပင်။ ထိုသူ၏ အပြုအမူတိုင်းက နူးညံ့ညင်သာလွန်းနေကာ သေပြီးသားကြောင်လေးများ ထိခိုက်သွားမှာ စိုးရိမ်လွန်းနေသည့်အလားပင်။ ‌‌‌သွေးစွန်းနေသော လက်ချောင်းလေးများက ‌ဓားဒဏ်ရာတစ်လျှောက်ကို စမ်းရင်း ဓားရာတစ်ခုချင်းကို မှတ်သားနေသည်။ သွေးများ ဖုံးလွှမ်းနေသော နေရာဖြစ်သောကြောင့် ထိုသူ၏ အပြုအမူများ ဘယ်လောက်ပဲ နူးညံ့နေပါစေ ကျက်သီးတဖျန်းဖျန်း ထလောက်သည်အထိ ကြောက်စရာကောင်းနေ၏။

ကျိမင်ရွေ့က မျက်လုံးမှေးကြည့်ရင်း ပြန်ပြောသည်။
" သူ ဒီလောက်တောင် အရွယ်တင်တာ ကျွန်တော်ဖြင့် ယုံတောင် မယုံနိုင်ဘူး.. သူ အဲ့လောက်ထိ အသက်ကြီးပြီပေါ့လေ"