အန္တရာယ်ရှိသော စရိုက် - ဘာသာပြန်

Chapter 68- ဓာတ်ပုံဘောင်

Unicode

ထိုညက ဆေးရုံအနောက်ဘက်ရှိ စွန့်ပစ်ထားသော တောအုပ်ငယ်လေးထဲတွင် လူတချို့ စုဝေးခဲ့ကြသည်။ မှုခင်းရဲများအားလုံး တောအုပ်ငယ်လေး၏ ဧရိယာတစ်လက်မပင် မကျန်အောင် ပိုက်စိပ်တိုက် ရှာဖွေကြ၏။

စွန့်ပစ်ထားသော တောအုပ်ငယ်လေးထဲတွင် ဂရုစိုက်မည့်သူမရှိ၍ သစ်ပင်များသည်ပင် အသက်မဲ့နေသည့်အလား ပါးလျနေသည်။

အချိန်က မနက်နှစ်နာရီခန့်ရှိနေပြီ။

ရှဲ့လင် စကားအဖြစ်ပြောသော "အချိန်ပိုဆင်းရသည်" ဆိုသော စကားစုမှာ အတည်ဖြစ်လာခဲ့သည်။

အမှောင်ကြိုက်သော ချီချင်းအတွက် အလှမ်းဝေးကာ လူသိပ်မရှိသည့် နေရာမျိုးကို သဘောကျသည်မှန်သော်လဲ မနက်နှစ်နာရီအချိန်ကြီးတော့ အလောင်းတစ်လောင်း မြှုပ်ထားသည့်နေရာတွင် ခြေကျိုးတစ်ယောက်ကို တွဲ၍ မရပ်နေချင်။

မကြာခင် ရှာဖွေမှုကို အရှိန်မြှင့်နိုင်ရန် ချီချင်းလက်ထဲသို့ ဓာတ်မီးတစ်လက် ထိုးထည့်သွားခဲ့သည်။
" လက်ထောက်အကြံပေးချီ.. ခင်ဗျားနဲ့ အကြံပေးရှဲ့နဲ့ ဟိုနားလေးမှာ သွားရှာပေးနော်"

"..."
ချီချင်းမှာ လက်ထဲမှ ဓာတ်မီးကို ကြည့်ရင်း တအံ့တဩရေရွတ်နေသည်။
" ဒါကို အချိန်ပိုဆင်းတယ်လို့ ခင်ဗျားခေါ်လား"

"ဟင်"

"တမင်သက်သက် ထိုးထည့်သွားတာပဲလေ"

ရှဲ့လင်က ချီချင်းကို ပခုံးကျော်၍ ဖက်ထား၏။ ချီချင်းမှာ လျော့ရဲရဲ ကုတ်အင်္ကျီသာ ဝတ်ထားသည့်အတွက် တစ်ခါတစ်ခါ ချီချင်း၏ နူးညံ့သော လည်ပင်းသားလေးများကို ထိမိနေသည်။ ရှဲ့လင်က လက်ချောင်းလေးများကို ရွှေ့ကာ ဆက်ပြောသည်။
" ဒါကတော့ အမိန့်နာခံတယ်လို့ ပြောရမှာပေါ့... ဘယ်လိုလုပ် တမင်ထိုးထည့်တယ်လို့ ယူဆမှာလဲ... လူတွေက မင်းကို ကျေးဇူးတင်ကြမှာ... ကိုယ်လဲ မင်းကို ကျေးဇူးတင်မယ်လေ..  မနက်ဖြန် ကိုယ် မင်းကို ညစာလိုက်ကျွေးမှာဗျ"

ချီချင်းက သူ့ရှေ့မှ မြက်ရိုင်းများကို ဖယ်ရှားရင်း ခေါင်းငုံ့ကာ အထဲဝင်သွားသည်။
" ကျေးဇူးတင်တယ်ဆို အနှောင့်အယှက် လာလာမပေးနဲ့"