Once A Love Story - #Wattys2018 Winner

Chapter Seven

KANINA pa gising si Caleb, o mas tamang sabihin na hindi naman siya nakatulog. Ika-lima na nang madaling araw at kaaalis lang ni Erina. Nagkunwari siyang tulog pa rin nang lumabas ito ng silid. Muli siya nitong dinampian nang maikling halik sa labi bago umalis.

Nakatitig siya sa kisame, hindi mawari kung sadya lang malakas ang loob ng dalaga na gawin ang magustuhan dahil may tiwala ito sa kanya, o talaga lang nanunubok ito kung hanggang saan niya kayang kontrolin ang sarili. He almost grabbed her the second time she put her lips on his. Sobrang pagpipigil ang ginawa niya para lang manatiling tuod sa ginagawa nito.

Kaylambot ng mga labi ni Erina, nanatili pa rin sa ilong ang masarap sa pang-amoy na gamit nitong pabango. Paulit-ulit naglaro sa kanyang imahinasyon ang mga ginawa nito. Bumangon siya't umupo. Napangiti nang maalala kung paano nitong isigaw ang kanyang pangalan. Manipis na dingding lang ang kanilang pagitan kaya nadinig niya iyon. Tiningnan niya ang kamang ginamit nito sa nakabukas na silid, tumayo siya't pumasok doon.

Nakulong sa loob ang pabangong gamit ng dalaga. Naupo siya sa kama at sinalat ang sapin na nalukot sa paghiga nito, kinuha ang unan na ginamit nito at inamoy. Erina...his lips muttered. Humigpit ang hawak niya roon, humugot ng hininga, pinakawalan. Anong ginagawa mo sa akin? Pagkuwa'y napailing sa sarili.

Tumayo siya't umalis na rin bago pa magsidatingan ang kanilang mga tauhan sa tindahan.

BACHELOR of Science in Business Administration ang kursong kinuha ni Caleb at ito ang kanyang unang taon sa kolehiyo. Binigyan siya ng options ng magulang na mag-aral sa Maynila o sa ibang bansa, at anumang kursong gustuhin niya na walang kaugnayan sa negosyo ng pamilya, ngunit pinili niya ang manatili sa kanilang bayan. Gusto niyang sumunod sa yapak ng ama at ituloy ang mga negosyong ipinundar at pinalago ng mga magulang nito.

Kauumpisa pa lang ng pasukan. Naupo siya sa isa sa mga silyang bakante tsaka nagmasid sa kabuuan ng klase nang makita ang bagong dating na kaibigan, nakangisi. Palihim din siyang ngumisi, kung akala nito may makukuha itong impormasyon sa kanya ay nagkakamali ito.

"P're, hindi ka na bumalik kagabi a? Tanong nang tanong ang mommy mo," untag ni Rommel na umupo sa kanyang tabi. Parehong kurso ang kanilang kinuha, pwera kay Danilo na pinili ang Agri-business kaya nasa ibang building at department ito.

"Oy." Tumango lang siya.

"Ano?" Diretsong tingin nito. Anak si Rommel ng katiwala nila sa mansiyon sa Del Rio at lingguhan kung ito ay umuwi sa mga magulang nito.

"Anong ano?" Kumunot ang kanyang noo.

Tinapik siya ng kaibigan sa balikat tsaka tumawa. "Anong nangyari sa inyo ni Erin?"

Nagkibit balikat lamang siya, sinuri ang librong hawak.

"May nangyari ano?" Lalong lumakas ang pagtawa nito, nakaagaw pa ng atensiyon ng ilan sa kanilang mga kaklase.

"Gago, kung ano-anong iniisip mo." Binuklat niya ang libro, binasa ang nakasulat doon ngunit wala naman siyang maintindihan kahit ilang ulit pa niyang basahin iyon.

"Meron ano? Halata ka e." Siniko pa siya sa braso.

Nagpakawala siya nang malalim na hininga "Hindi ko alam kung anong nagustuhan ni Juliet sa 'yo ganyang daig mo pa ang babae sa tsismis. Tumabi ka nga."

"'Sus, sabi na e, gusto mo rin siya."

Sasagot uli siya ngunit natigilan nang nakita ang dating kasintahan na nakasilip sa kanilang klase. Saglit na nagtalo ang kanyang kalooban, ngunit sa huli ay nagdesisyon siyang lapitan ito. Tumayo siya, lumabas ng klase at nilapitan ang dalaga.