امطري ياخيبة كبار الهقاوي .. وارعديّ

P1- مقدمة

London, Westminster
7:15AM
رنة تلفون البيت تتردد في المنزل ، ترددات جديدة تحمل بدايات وتغيرات جديدة

أبو أصيل: الموضوع بسيط بالنسبة لك لكنه صعب علي كيف تطلب مني أترك شغلي والحياة اللي كونتها وبديتها وأرجع لنقطة الصفر؟ ممكن أجي زيارة وأرجع بس الإستقرار فكرة صعبة علي
في أثناء هذا الحوار كانت أصيل واقفة بإستغراب تنتظر توضيح
اول ماأنتهت المكالمة قالت أصيل: بابا مين تكلم؟
ابو اصيل ابتسم لها: اخوي
وقبل تكمل اسألتها كمل كلامه وقال: افطري واطلعي دوامك نتكلم اذا رجعتي

الرياض
9:30AM

دخل أبو فيصل بإبتسامة تحمل تباشير للجد خليفه
الجد خليفه بفزه: وش صار على موضوعنا يا منصور؟
أبو فيصل: ما يصير خاطرك الا طيب يبه، اطلعوا يا عيال خلوا جدكم يرتاح شوي
طلعوا برا تدريجيًا
فيصل وهو يقفل الباب وراه ويضحك: جدي وعمي يحسبون انهم غامضين وكلنا ندري وش موضوعهم
بتال بزفره: انا ماني فاهم ليه جدي يبيه يجي وهو عاق فيه كل هذي السنين وقاطعهم عشان وحده ما تسوى
فيصل: اذكروا محاسن موتاكم يا بتال، الادميه بقبرها
عبدالعزيز: طيب تتوقعون بيجي عشان جدي؟ واذا جاء وين بيعيش اصلًا
بتال: قاعدين تتوقعون منه كثير لو فيه خير لجدي ما عصاه
فيصل: انت وش فيك؟ تراه عمك والظفر ما يطلع من اللحم حشم
معاذ: طولتوا السالفه وهي قصيره، عمي وجدي بيتصرفون بالموضوع بكيفهم خلونا نرجع بيوتنا بس

London
5:00PM
أبو أصيل: أنا عارف ان اللي بقوله صعب عليك وعلي بس احنا لازم نرجع الرياض
أصيل بصدمة: نرجع الرياض ليش؟ بابا احنا ما نعرف احد هناك
أبو أصيل: كيف ما نعرف احد هناك؟ فيه عمامك هناك
أصيل: بابا صار لي ٢٣ سنة هنا انولدت وتربيت وعشت هنا وانا ما اعرف الا أنت والحين تبيني ببساطة اتقبل فكرة انهم عمامي وبنرجع لهم؟ بليز بابا افهمني الموضوع صعب وش اسوي بدراستي وحياتي
أبو أصيل بحده: انا فاهمك يا أصيل بس هذولا أهلك زي ما هم اهلي وهذي الفكرة المفروض تكونين متقبلتها من زمان، رجوعنا للرياض حتمي تقبليه
أصيل والدموع بدت تتجمع في عيونها خوف وإستنكار للقادم: اذا انت تبي ترجع لأهلك وقرارك حتمي ليه خليتني اتعود على حياتي هنا؟ هم اهلك بس انا ما اعرفهم ولا راح اتحمل الحياة بمكان ما اعرفه مع ناس ما أعرفهم
أبو اصيل وهو يلف يدينه حوالي ظهرها ويحضنها بحنيه: أنا فاهمك وداري ان الموضوع صعب عليك بس حتى انا صعب علي ومضطر عشان أبوي، انتي تبيني اندم اني ما شفت ابوي وحققت طلبه وهو تعبان؟بجهز بيتنا وأمورنا بالرياض، ودراستك بتكملينها هناك وبكون معاك زي ما انا معاك هنا مو هذا المهم؟
أصيل وهي تمسح دموعها وتوخر عنه: أنت مقرر وخالص وواضح انك جهزت كل شيء اساسًا ف رأيي مو مهم ليه تشاورني

الرياض
9:00PM
أبو فيصل بهدوء وهو يتقهوى: فيصل وبتال تساعدوا تنقلون اغراض فيصل يرجع لشقته هنا وجهزوا الفيلا لعمكم
فيصل وهو يحاول يقلل من صدمته: إن شاء الله يبه ابشر
قام فيصل بهدوء وبتال طلع وراه
بتال بضحكه: وش شعورك؟
فيصل بحده: وش تبي يكون شعوري يعني؟ بالنهاية بيته مالي حق اعترض
بتال: بيته؟ عجيب والله، تراك اخذت البيت وهو عظم قبل ما يكتمل تجهيزه لشخص مو موجود اصلًا يعني من حقك تعترض بس خل إحترامك ياكل حقوقك مالي شغل فيك

بدت تجهيزات البيت على قدم وساق بعد ما وصل الخبر لكل أفراد العايلة إن العم سيف بيرجع السعودية بعد غياب ٢٥ سنة، والأفكار في اذهان الجميع كيف بيتأقلمون معاه؟ وكيف بيتأقلمون مع بنته اللي بتكون تربيتها وأفكارها ومعتقداتها مختلفه عنهم تمامًا