كانت ليلة صعبة كثييير على هند تصحى فيها ساعه او ساعتين تغرق بدموعها وذكرياتها وتنام مخنوقه اكثر ، اوجعها قلبها ورجفت اطرافها وتورمت عيونها وشفايفها وحتى النفس كان أثقل عليها من خروج روحها .. بكت هند المراهقه الي كانت تحب رعد وماتتخيل حياة بدونه هند الأولى القوية الصعبه قبل يرفضونه ويزوجونها بالأجبار ويخلقون منها شخصيه هاديه ماعندها قدره تواجه نملة واكبر احلامها حياة مستقره بعيد عن المشاكل بعد ماكان عندها احلام وطموحات تبي تنجزها مع الشخص الي تحبه ، بقت على هذا الحال ليلتها كااامله الى ان حَل عليها الظهر
بعد الظهر على طاولة الغداء كان الجمييع في مجلس الجد .. باسثناء عائلة هند وزينه
همست مريم لسيف: متى رايح لأصيل؟ بروح معاك
ناظر سيف ساعته: بعد الغداء يمكن
انتبهت لحوارهم الجده: سيف بتروح لبنتك؟
سيف: ايه امري
الجده: انتظر شوي برسل معاك جريش ومراصيع
سيف: لمين؟
الجده وهي تناظر اكلها قالت بصعوبه وتردد: لأصيل
رفع سيف عيونه لأمه بأستغراب وماكان الوحيد المصدوم الكل ناظر الجده مستغرب حنيتها المُفاجئه على اصيل .. خصوصًا هند الي امس تجرعت مرارة قسوتها
ابتسم سيف وفيه ضحكه: ابشري .. كثر الله خيرك ماتقصرين
الجد: هند وش فيه وجهك تعبانه؟
توترت هند وناظرت صحنها: شكلي اخذت برد امس
الجد: ليه مارحتي المستشفى؟
دمعت هند ونزلت راسها عشان لاينتبه احد: بسيطه ماعليك لاتشيل هم
تصرفها مامَر على الجده وسيف وحصه لأنهم عارفين الموضوع كاامل .. اما ابو فيصل وابو معاذ كان عندهم شك مو متأكدين ولحسن حظها انهم ماتأكدوا لأنهم راح ينتزعون حتى بقايا الذكريات الي رجعت لذهن هند ورعد ، غيرتهم على اختهم كانت فوق كل شيء
مهره: عمه عندي دواء كويس كلي وبجيبه لك بعد الغداء
ناظرها بتال بخوف: واذا ماتحسنتي لازم اوديك المستشفى
ردت هند بحده: خلاص مافيني شيء
استغربوا ردها ومحد علق غيروا الموضوع على طول
بعد الغداء كانو البنات متوجهين لبيت ابو معاذ
لين: عمه هند مو طبيعيه!
مهره: اييه ابدًا
ليان: حرام يمكن مرهقه من سهر المستشفى وضغطوا عليها
لين: شدعووه ترا نامت يوم كامل ارتاحت مب قصة ارهاق
ليان: ماأدري بس عمومًا كسرت خاطري اف يارب تصير كويسه
مهره: بخاطري اروح اكلمها لكن خايفه تفصل علي مره ثانيه
لين: لا اتركيها واضح ماتبي احد يضغط عليها
جلست ليان على الكنبه بأرهاق: اتركوا عمه على جنب ، جده بتسوي لأصيل اكل!!
ضحكت مهره وجلست قدام ليان: ارجووك ماقدرت استوعب الصدمه
جلست ليان بأنفعال وهي تضحك: انتي شفتي نظرات الكل لما قالت انها بتسوي؟
عقدت مهره حواجبها وبان عليها تأثرت: حرام بنات مره انحرجت لما الكل ناظرها كذا
لين: ماينلامون صراحه ، حتى عمي سيف سكت شوي ماصدق الي سمعه
مهره: ماكلمتوا اصيل؟
ليان: الا ارسلت لي الصباح تشكرني على الورد
مهره: وكيفها؟
تغيرت ملامح ليان لجديه اكثر: انتي يوم رحتي لها كانت بخير؟ سجلت لي فويس تقول انها كويسه لكن مافيي صوت صوتها مره تعبان
مهره: ايه برضو كان صوتها رايح من التعب لما كنت عندها
لين بحزن: حراام بنات خلونا نروح لها اليوم لانتركها لحالها
ليان: كأني سمعت ان عمي سيف بيروح لها ، نروح قبله واذا راح نرجع عشان مانتاخر ونتعبها وش رايكم؟
وقفت مهره بحماس: تتم اصلًا هو بينتظر جده تخلص طبختها
ليان: يلا اجل بسررعه تجهزوا لانها صاحيه الحين
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
