من دخلت اصيل المستشفى مااوقفت بكاء وتحديدًا بعد مابلغوها انها تحتاج عملية وصل خوفها لذروته وبالأضافه لتعبها زاااد تعبها النفسي وكان هالشيء جدًا واضح عليها بسبب وجهها الأصفر الشااحب وهالاتها رغم تهدئة رعد والعنود المتواصلة لها الا انها أبت الا ترسل لهند تجي لعندها ولسبب ما هند الأقرب لقلبها من الكبار وتحس بالأمان معها اكثر
وفعلًا الساعه ١ بعد منتصف الليل دخلت هند المستشفى تهرول من خوفها بس تبي تشوفها وتطمن قلبها عليها
وقفت عند الرسبشن سألت عن مكان اصيل وقبل يجاوبها الموظف وصلها صوت رجولي مألوف من خلفها: غرفة رقم ٨ في الطوارئ
تقشعر جسدها وجمدت في مكانها تستوعب الصوت الي سمعته غمضت عيونها لثواني تسترجع ذكريات بشكل سريع والتفتت بجسدها كامل له وتعلقت نظراتهم ببعض شافت كيف الأيام غيرته كثيير وتفرق الشيب بشعره وازداد عرض اكتافه وتغير مظهره كثييير لشخص أكثر نضج وكان يناظرها بملامح ملهوووفه وجزء منه ماصدق يسرق نظره او يسمع رد ، صحيح كانو صامتين لكن عيونهم المليانه دمووع تكلمت ووصلت مشاعر متراكمه سنييين ولا احد فيهم تخطاها
بعد هذا اللقاء الصامت نزلت راسها هند وكملت طريقها لغرفة اصيل وهي تحاول تهدأ وتخفي دموعها
وتركت خلفها رعد العالق في نفس المكان ونفس السرحان لازال غارق بملامحها قد ايش تغيرت وكيف صارت انسانة هاديه ماتقوى حتى ترد عليه بعد ماحاربوا في شبابهم عشان بعض انتهى فيها المطاف تمشي من قدامه ولا كأنها تعرفه
دخلت هند غرفة اصيل وشافتها على السرير تبكي بوجه مررهق وتعبان وخالي من الحياة كأنها جثه وجنبها العنود تهديها
سلمت على العنود وتوجهت لأصيل على طول حضنتها: بسم الله على قلبك ياروحي
انهارت اصيل اكثر بحضن هند: عمه بيسوون لي عمليه وبابا مو معاي
جلست هند قدامها على السرير مسكت راسها ومسحت دموعها: لا يا ماما بنكلمه وراح يجي
مسكت اصيل يدين هند وهي تشاهق: طيب ولو قلت له وماجاء؟ والله راح امووت
رجعت هند حضنتها: لاا ماراح تموتين بسم الله عليك اهدي
طق الباب ودخل رعد: الدكتور بيجي
تحجبوا كويس ودخل الدكتور وكل هالوقت رعد يحاول يشتت عيونه عن هند احترامًا لها رغم انه منششد لها من شوقه ، وكذلك هند لافه وجهها عنه ماتبي تتلاقى عيونهم
الدكتور: السلام عليكم ، كيف حالك اصيل؟
رفعت اصيل بترد وأول ماجت عيونهم ببعض انربط لسانها ماقدرت ترد وكلهم ساكتين يناظرون بعض
رقع رعد الموقف: اصيل هذا سعود ولد خالتي ، طبيب ممتاز جدًا ، كويس انه موظف هنا كلمته يمسك حالتك و يطمنا عليك
بعد ثواني قالت اصيل بصوت هادي: تمام
تنحنح سعود وتقدم بيفحصها: رفعت معنوياتي يارعد الله يسلمك ، بس لاهنت الحين تفضل عشان اقدر افحصها
ضحك رعد وطلع
وقف سعود يمين اصيل وهو يتذكر المره الوحيده الي شافها فيها ، كانت واقفه برا في حفلة عبدالمجيد تبكي لدرجة صوت شهقاتها شده وتقدم يهدّيها وأعطاها منديل والحين هي مريضه اشبه بالجثه بين يدينه وواجب عليه يساعدها مب تكرمًا منه نفس اول مره
واصيل لفت وجهها ماتبي تناظره مُحرجه من الطريقة الي شافها تبكي فيها ومن وجهها التعبان الحين
سعود بنبره مليانه توتر من الصدفه: معليش اكشفي بطنك
تقدمت هند ساعدتها ورفعت تيشيرت اصيل
العنود: اصيل حبيبتي اهدي لاتتوترين سعود مره شاطر بشغله ترا
بدأ سعود يضغط بطنها ويحاول يوصل لمكان الورم ويتحسسه بأصابعه: سهالات وانا اخوك ، بس العمليه بأقرب وقت من صالحك
رجعت اصيل تبكي تبي تهرب من العملية بأي طريقة
مسكت العنود يدها ومسحت على شعرها بيدها الثانيه: لااتبكين ياروحي كلهم قالو الموضوع بسيط مايخوف
حاول سعود يسيطر على انهيارها ويهدّي الموقف: العملية بسيطه وجرحها ماراح يكون كبير ، ومضاعفاتها ان حصلت بسيطه برضو
قالت اصيل وسط شهقاتها: اعرف
سعود: اجل ليه تبكين؟
تقدمت هند لها: تبين اكلم سيف يجي؟
اصيل: لا ، متى العمليه
سعود: راح تكون بعد الفجر والان بننقلك للجناح لازم ترتاحين وتنامين وانا بكتب لك منوم ان شاءالله ، قدامك العافية يارب
طلع سعود من الغرفه وقابل رعد عند الباب
رعد: طمني؟
سعود: نفس الكلام الي قلت لي ان الدكتور قاله لكم ، العمليه شيء لابد منه يارعد لاتحاول تأخرها او تمنعها لأنه مابيكون من صالح المريضة
تنهد رعد: ان شاءالله ، يعطيك العافيه سعود ماقصرت
سعود: الله يعافيك هذا واجبي ، الحين بننقلها للتنويم لحالها لأنه مو وقت زيارة
رعد: طيب بس بتطمن عليها الحين
سعود: خذ راحتك
دخل رعد وشافها تبكي: افاا تبكين واحنا كلنا عندك
قامت هند من السرير وسمحت لرعد يجلس جنبها
حضنها رعد وباس راسها: لاتخافين ياروحي والله لو بيدينا شلنا هالتعب وماسويتي العملية بس هذا الحل الأفضل لصحتك ولازم الانسان يكون صبور ويتحمل ، الدنيا ماهي دايم مرابيع بتجيك اوقات شده اصبري عليها وانا خالك
مسحت اصيل دموعها وهزت راسها بايجاب: ان شاءالله
دخلوا ممرضتين معهم سرير بينقلون اصيل لقسم التنويم
وقف رعد: احنا بنروح لان مايصير ندخل معاك ، اي شيء تبينه اتصلي علي ماراح انام وبجيك الفجر قبل يدخلونك العملية
اصيل: نام ماعليك حتى انا راح انام
ناظر رعد كمية الهم بوجهها ماكان وجه شخص راح ينام ابدًا: انا بكون صاحي لاتترددين تكلميني ابدًا
ابتسمت اصيل بالقوه: حاضر
ترددت العنود شوي لكن تكلمت: هند فيه احد يوصلك ولا نوصلك معنا؟
انقبض قلب رعد وطلع قبل يسمع رد
ابتسمت هند: لا حبيبتي يعطيك العافيه سواقي برا
العنود: الله يعافيك
طلعوا وجت هند لأصيل: اصيل ماما لاتكابرين تبين اكلم سيف؟
اصيل: عمه ارجوك لاتكلمينه ، هذي بذمتك!
تنهدت هند: وكيف بتبقين منهاره كذا عشانه وماتبين نكلمه
اصيل: ماعليك ماببقى كذا راح انام
هند: وعد؟
اصيل: ان شاءالله ، انتي روحي ارتاحين وماعليك
هند: انا صاحيه ارجوك ياأصيل اي شيء تبينه تكلميني
اصيل: حاضر عمه لاتشيلين هم
طلعت هند من شنطتها شاحن متنقل وفلوس واعطتها: خذي اخاف تحتاجين شيء
اخذت اصيل الشاحن ورجعت لها الفلوس: شدعوه عمه معي والله
هند: والله تاخذينهم اخاف تحتاجين كاش
اصيل: والله مااخذهم وش بحتاج بالكاش يعني
سحبت هند جوالها وحطت الفلوس بالكفر: مالي خلق عنادك ابد
ابتسمت اصيل: يعطيك العافيه
باست هند راسها: الله يعافيك انتبهي لنفسك وحاولي ترتاحين
اصيل: حاضر
قالت هند وهي طالعه: استودعتك الله
بعد ماطلعت هند نقلوا اصيل للجناح وبمجرد ماطلعوا الممرضات وبقت لحالها رجعت انهااارت بكاء
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
