قبل صلاة الجمعة صحى سيف يتجهز للصلاة ووقف بالصالة يتبخر
نزلت مريم بوجهها النوم: توقعتك طلعت كنت اناديك وماترد
سيف: ماسمعتك حبيبي كنت مستعجل عشان مااتأخر
مريم: وش رايك نطلع نتغدى برا اليوم
سيف: المشكلة ان اليوم جمعة ولازم كلنا موجودين على الغداء، يناسبك عشاء؟
ابتسمت له: مو مشكله
باسها وطلع
دخل مجلس ابوه عند اخوانه وعيال اخوانه يتقهوون
الجد: احد تطمن على هند؟
ابو فيصل: انا ماكلمتها حسيتها منحرجه ومابي اضايقها
سيف: انا بروح لها بعد الصلاة اجيبها تتغدى معنا
ابو معاذ: زين تسوي والله
بتال: الولد وينه؟ ماشفته عند امي ترا
سيف: في بيتي عند مريم
الجده: بدل ماتاخذ عيال الناس جيب ولد من ظهرك
تنهد سيف بقل صبر: لاحول ولا قوة الا بالله
الجده: تعصب ولا ماتعصب هذا الصحيح عاد
ابو معاذ بمحاولة لقطع الموضوع: قوموا قوموا لايدخل وقت الصلاة واحنا نتقهوى
بعد الصلاة راح سيف لبيت حصه يقنعهم يتغدون عندهم
دخل الصاله: مساء الخير
هند وحصه: مساء النور
سيف: جازت لكم الجلسة لحالكم؟
ضحكت حصه: خساره خربتها علينا
سيف بمزح: اعقبي بس وقوموا البسوا بسرعه ابوي ينتظرنا على الغداء
هند: لا تكفى سيف انا مب رايحه اذا حصه بتروح عادي انزل ف بيتي
سيف: ترا مو ماكل من امس والله ياهند لو ماجيتي تتغدين معاي اني ماباكل
هند حست انها راح تبكي من الضغط: لاتضغطني كذا خلاص انا باكل هنا بس مالي خلق اطلع
سيف: والله اذا تعزيني مابتتركيني جوعان كذا
حصه: خلاص هند قومي حابسه عمرك على وش عاد؟
هند نزلت دموعها: مالي وجه اقابل اهلي بعد سواد الوجه الي سواه
سيف: اذا فيه احد المفروض يستحي على وجهه ف هو عزيز مب انتي واهلك صدرهم مشرّع لك مو بس ابوابهم ومحد بينقد عليك او يفكر فيك تفكير سيء كلنا قلوبنا عليك
حصه: ياما وياما انحطينا بمواقف تفشل من عيالنا بس بالنهاية ماوقف معنا الا اخواننا وابوي وامي هذولا اهلنا
مسحت هند دموعها وقامت: خلاص بروح بس مابنطول
سيف ابتسم: انتي البسي ومالك شغل بالباقي
في مجلس الجد بدأو يجتمعون ودخل سيف مع خواته
الجد بدأ يرحب بهند بحفاااوة عشان لاتحس بشيء من ناحيته
حصه: الله لنا يايبه
الجده: تعالي عندي وانا امك ماعليك من ابوك وبنته
بدأت المحارشات بينهم وقدروا ينسّون هند الي صار الى ان دخلت مريم وبيدها غيث "ولد عبدالعزيز" انقللبت ملامح هند وصارت هاديه
حس بتال بالموقف وقام اخذه بحضنه بنهاية المجلس ورغم كرهه للأطفال كان يلعب معاه
الجد ناظر سيف: وين بنتك؟
سيف: ماأدري يمكن نايمه
الجد بنبرة جديه: تعرف اني ماأمزح باجتماع غداء الجمعه بالذات ومو اول مره ماتجي
حس سيف بالأحراج: ابشر الحين اناديها
مهره همست لليان: الشمس من وين طالعه
ليان: واذا جت خزوها مايعجبهم العجب
مهره: معها تحديدًا مايعجبهم العجب وسمعتي كلامها امس عنهم
ليان: بصراحه معها حق غيث لو بقى هنا راح يعاني
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
