امطري ياخيبة كبار الهقاوي .. وارعديّ

٥٧

صحت مهره من النوم فتحت جوالها شافت الساعة وكانت ١ الظهر جلست بفراشها تمغطت وناظرت البنات نايمين ، مسكت جوالها ودخلت محادثة معاذ كاتب لها "اشتقت لك"
أبتسمت رغم انها عاقده حواجبها من ضوء الجوال وكتبت: وانا اشتقت لك ، ماأدري افرح لك بدوامك او ازعل لأنه اشغلك عني
كان معاذ تو صاحي من النوم وجالس يتقهوى مع سيف وبتال سمع الأشعار وفتح جواله وأبتسم: لا أنبسطي لأن وظيفتي خطوة تقربني منك ، بينقال ان زوجك رجل شايل نفسه ماأكتفى بأنه وريث
ضحكت مهره: يكفيني انك رجلي الكامل بعيني ماأهتم ايش بينقال من الناس
معاذ: قريب ياحبيبة معاذك أوعدك برضي شوقك وأقصر المسافات
مهره: ماعندي اي شك وبنتظرك عمري كله
صحت اصيل وحست بهواء المكيف على اطرافها تقشعرت وسحبت اللحاف دخلت تحته الى ان تدفت شوي وطلعت راسها من اللحاف شافت مهره وهمست لها: متى صحيتي
ناظرتها مهره: قبل ربع ساعه يمكن
اصيل: وش رايك اقول للعاملات يجهزون فطور ولا غداء؟
مهره: وش رايك ننزل احنا نطبخ سوا؟
اصيل: وش ودك؟
مهره: عادي يصحون البنات ونقرر
ليان من فراشها وبصوت مليان نوم: باستا
ضحكوا اصيل ومهره وصحت لين من اصواتهم
مهره: بسم الله حسبتك نايمه
ضحكت ليان: صحيت من نقاشكم وجوعتوني نبي نطبخ باستا
لين: ازعجتوني اسكتو بنام
ليان: خلي ليالي الحب والسهر تنفعك ماراح نسكت
ضغطت اصيل الكلمة ورقعت مهره الموقف على طول وقامت شغلت النور: بلا كثرة كلام يلا خلونا ننزل نطبخ
اصيل: باخذ شاور سريع وبنزل اسوي لكم باستا تاكلون اصابعكم وراها
مهره: وانا بسوي لكم سلطه
ليان: حللوو انا بسوي حبحر مع الباستا
دخلت اصيل دورة المياة اخذت شاور وماكانت متحمله المويا اببدًا كانت تلسع حرق يدها من الشاي لكن وزي العادة حرقة جوفها من الموقف اقوى
طلعت بالروب وشافت البنات يبدلون ولين قدام المرايا تعدل شكلها
مهره: والله اننا قليلات ادب سطينا على اغراضك ولا كأن بيوتنا تبعد خطوتين
اصيل: شدعوه انا ماكنت بخليكم تروحون اصلًا خلونا ناكل سوا ونتقهوى
لين وهي تدور بميكب اصيل: اصيل بأيش تسوين حواجبك؟
اصيل: قلم اربن ديكاي
لين: عادي تسوين حواجبي زي حواجبك؟
كان جدًا واضح اهتمام لين الزايد بشكلها بسبب وجود بتال لكن اصيل مالها اي حق تسوي شيء بس كانت مضغوطه من تصرفات لين: يوه لين فاضيه! بننزل نطبخ البنات جوعانين اسويها لك بعدين
تأففت لين وجلست تسوي حواجبها
اخذت اصيل مرطب جسمها وبجامتها ورجعت دورة المياة عشان تلبس
وهنا كان دور مهره تحاول تمنع اي مشكلة محتمله وناظرت لين: لين عيب عليك كل هذي اللهفه تظهرينها قدام كل البنات ماتدرين ايش ممكن يكون تفكيرهم ووش بيقولون عنك
لين: لاا شدعوه اصيل ماتنتقد ابدًا وانتو مب غريبين
مهره: اصيل ماتنتقد بس شكلك مو حلو وانتي ملهوفه عليه مره خلاص اذا بينتبه لك راح ينتبه بدون محاولات
ليان: وهذا الكلام من زمان اقوله لك يالين
طلعت اصيل وغيرت مهره الموضوع: اصيل وش رايك نسوي لازانيا او فوتشيني؟
اخذت اصيل مبخره شعرها ووقفت تتبخر: عادي بكيفكم وش مشتهيين
وقفت ليان تمشط شعرها: نسويهم كلهم
ضحكت لين: ليان انتي واضح جوعانه مره اليوم
ليان: بنات اعشق فايبز الطبخ سوا ونجلس بعدين ناكل يوننسس
اصيل: صاادقه ، خلاص نطبخ كل الي تبين
مهره: طيب متى ناويين تخلصون ترانا بننزل نطبخ مو رايحين زواج
ضحكت اصيل: خلصت بتعطر بس
ناظرت اصيل عطوراتها وجت عينها على "اول حكايتنا" ترددت شوي لكن قررت تتعطر منه لأنها وااثقه ان ريحته بترجع بتال عشر خطوات للخلف وبيصعب عليه يتخطى اذا كل مره ذكرياتهم بتحاوطه ، ولأن ليه هي الوحيده العالقه بهذي الذكريات؟ لازم يتجرع شوي من المر الي عايشته بسببه
انتبهت مهره لسرحان اصيل بالعطر وزعللت على موقفها مره لكن ضربت كتفها بشويش: يلاا
تعطرت اصيل ونزلوا البنات سوا
ناظرت اصيل ابوها والعيال يتقهوون وراحت باست راس سيف: صباح الخير ، افطرتوا؟
سيف: لا باقي
اصيل: ليه العامله ماجهزت الفطور؟
سيف: احنا طلبنا قهوة انتوا افطروا ماعليكم
ليان: احنا نلعب على الثقيل نازلين نبي نطبخ غداء
معاذ: المعده تشكي
ولأن ريحة عطر اصيل وصلت بتال بقى ماسك جواله عشان مايقوم يفصل عليها بسبب تناقضاتها معاه
جا غيث يركض وجلس بحضن سيف وأبعد اصيل عنه
شهقت اصيل: ليه تبعدني عن حضن بابا؟
ضحك غيث وكانت متعتته يعاند اصيل على حضن سيف
حضنت اصيل سيف وهي تبعد غيث وأستمر الجدال الى ان عضها غيث وصرخت: يلعن شكلك والأسنان
ضحك سيف وباس يدها: تستاهلين ماتتوبين منه
اصيل: دايمًا يحسم الموضوع لصالحه بعضه وحده
سيف: اجل خلاص لاتمونين على مكانه
اصيل: اييه كل احد صاير مكانه حضنك الا انا
سيف: نمزح طال عمرك لاتشدينها
ضحكت اصيل وقامت مع البنات للمطبخ
سيف: الله يستر على بيتي لاينحرق اليوم
بتال: انا رأيي ان احتمالية الحريق كبيره جهز طفايات حريق
معاذ: ودي اروح لعمه هند اشتقت لها
بتال: حتى انا والله بس مستحي منها
معاذ: بشرني انك تستحي
بتال: لو ماتسد حلقك عني تراي بقوم اتوطاك
سيف: ليه تستحي صدقني هند ماتزعل منك وحنا اليوم ناويين نروح لها اصلًا
بتال: مين الي بيروحون
سيف: انا وابوك وعمك ، واضح هند متضايقه وماتجي من الي سواه عبدالعزيز واحنا والله ماحنا زعلانين او شرهانين عليها بالعكس هي ماقصرت معاه لكن هو كلب مافي موقف مافشلها فيه
كان بس ذكر عبدالعزيز يخلي بتال يغليي من داخله ويتمنى يرجع بين يدينه ويكمل يضربه: والله كلنا ندري ان عمه مالها ذنب بس هي دايمًا تلوم نفسها ووسيع الوجه يجي ولا كأنه مسوي شيء
سيف: انا اقول انت بالذات يابتال لو تروح لها ترا روحتك بتخفف عنها كثير
بتال: خلاص اذا بتروحون انا معكم
في المطبخ بين ازعاج الأغاني وسواليف البنات
اصيل: بنااات نسيت الملح يارب انكم حطيتوه على الصوص
لين: انا حطيت
مهره: وانا حطيت!!!
اصيل: قصرتوا
ليان: ذوقيه مالح قوه؟ يمكن يمدي نرقعه
اخذت من الصوص اصيل بطرف الملعقه: لا خلاص كويس
جلست مهره على الدولاب: تراودني فكرة
ليان: اعشق افكارنا لما نجتمع
اصيل: وش فكرتك
مهره: اذا ابوي وعمامي راحو لعمه هند بالليل بنسرق دبابات العيال ونطلع عليها
اصيل: تتتمم
لين: والعيال؟
مهره: اكيد يكونون طالعين
لين: طيب مين يعرف يسوقها؟
اصيل: انا كنت اسوق دباب بس ماأدري اذا الي هنا نفس الي اسوقه
ليان: انا مب مره اعرف الصدق
مهره: انا اعرف بعلمكم ، فيه حق بتال وحق معاذ نطلع عليهم كل اثنين بدباب
اصيل: يمه اخاف استخدم شيء مب لي
مهره: شدعوه مابيصير شيء وكثير طرق فاضيه قريب نروح لها
ليان: ليه طالعين فيهم اذا بنروح طرق فاضيه؟
مهره: لان مامعنا رخصة دباب
اصيل: خلاص بس تأكدو انهم طالعين ومتى يرجعون ماله داعي يقفطونا وناكل هواء
لين: يمه بنات يخوف
ليان: خلاص لاتطلعين بما انك خايفه مانبي احد ينكدها
لين: والله ماأجلس وانتو طالعين
اصيل: بسوي شعري ويفي عشان يطير مع الهواء وهو حلو
مهره: الله يلعن اهتماماتك
ليان: اسكتوا خلاص لاينفتح الموضوع ابدًا مانبي يحس احد ، خلص الاكل؟
اصيل: ايه يلا جهزوا صحون السلطات والأكواب انا برتب الاكل على الطاولة
طلعت اصيل من المطبخ جهزت الطاولة رتبت الصحون عليها وشغلت شموع وجابت العاملة الأكل وجو البنات
اصيل: بابا تعالو تغدو
سيف: ماودنا نتسمم يابابا
اصيل: والله بتخسر كثيير لو ماذقت طبخنا بكيفكم
ضحك سيف وقام: يلا عيال
بتال: بس والله ، بالعافية
سيف: قوم بس والله ماتطلع من البيت مو متغدي او مفطر
بتال: والله ماني مشتهي
سيف: انا قلت قومو تغدوا مانيب مترجيكم ساعه
ضحكوا العيال وقاموا معاه للغداء
اخذت اصيل صحن سيف حطت له باستا وأعطته: ترا انا سويت الباستا ياويلك مني لو ماأعجبتك
سيف: يعني باكلها غصب وتعجبني غصب؟
اصيل: ايه حاصل لك تذوق طبخي ومايعجبك بعد؟
سيف: والله من البلشه
ناظر معاذ سيف وبتال: وش رايكم نطلع مقهى بالليل ونعزم عمر؟
سيف: مين عمر؟
معاذ: الي امس لقينا الفرس عنده
بتال: اقسم بالله غثيث وش تبي به
معاذ: كل تبن والله من نفسيتك محد عاجبك ، الرجال مزوح وكريم وكثر الله خيره ماجحدنا بفرسك
بتال: اسكت بس اسكت
ضحك سيف: والله مايعجبك العجب
معاذ: ها عمي معانا؟
سيف: ان شاءالله
ناظرت اصيل مهره بأبتسامه فهموها البنات
بتال: اجل على المغرب نروح لعمه هند عشان يمدينا الوقت
معاذ: خلاص انا برسل له الحين واحدد معاه بعد العشاء اذا يناسبه
اصيل: بابا ماتعرف احد ثقه يبيع تكت ليلة محمد عبده؟
سيف: صادقه تدورين تكت والحفله بكره؟ ليه ماقلتي لي بدري احجز لك معنا انا ومريم حاجزين من زمان
اصيل: ماأدري تو صار ودي اروح
ليان: حتى انا دورت بكل مكان ولا لقيت موقع ثقه
سيف: بنات تحسبون الدنيا بيوم وليلة؟ انا والعيال كلنا داخلين انتظار بالموقع وبصعووبة حجزنا مستحيل تحصلون الحين
مهره: نعوضها الحفلة الجايه اجل لاتزعلون
قام بتال: اكرمكم الله
سيف: عوافي بس ماأشوفك اكلت
ابتسم له بتال: الا والله شبعت كثر الله خيرك
سيف: بالعافية
ناظر معاذ ساعة جواله وقام: بتال بروح احلق تروح معاي
بتال: كأنك حاس اني ناوي احلق قبل الحفلة
معاذ: يلا اجل تراي كلمت الحلاق وحجزت
طلعوا العيال وطلع وراهم سيف لمجلس الجد
مهره: ككلل شيء مُيسر لنا
اصيل: طيب ليه مانطلبهم بكل أدب؟
ليان: اصيل تراك مو ف لندن تطلبينهم الدباب ويعطونك اياه! هذا دباب مو سيارة يقولون عيب نركبه
اصيل: خلااص لاتهاوشيني طيب بنسرقه
مهره: يلا انا بروح بيتنا تبون شيء
اصيل: لاا خليك
مهره: تستهبلين سهرنا ونمنا وطبخنا وكلينا ماطفشتي مني؟
اصيل: لا نبي نتقهوى
ليان: صدق بنروح خلاص وش الضيف الثقيل هذا
اصيل: سخيفيين بدري
ليان: ماعليك جدولنا الليلة طويل بنطفش من بعض
اصيل: طيب اول مايطلعون قولولي
مهره: تمام