انتهى يومهم بشكل عادي وجا صباح يوم اخر ، زي العاده كل احد راح دوامه ولازال فيصل في رحلة بحث اهلكته نفسيًا وجسديًا عشان يساعد بتال وكذلك نواف كل معارفه الي ممكن يساعدونه كلمهم ولا حصل احد يقدر يساعدهم بشيء وبعد الدوام راح ياخذ معاذ
ركب معاذ السيارة وناظره نواف: وش صار مع فيصل؟
معاذ: كلمته يقول باقي يحاول
نواف: عمك سيف بالبيت؟
ناظر معاذ جهة السيارات وشاف سيارته: ايه
نواف: يلا ننزل نكلمه
معاذ: انتظر نشوف وش يصير مع فيصل
نواف بعصبيه: لمتى؟؟ كل احد قابلته قال لو وصلت للمحكمة مستحيل نقدر نسوي شيء الى متى بننتظر
عصب معاذ وناظره بحده: كأنه هاين علي يعني؟ ليه واثق انهم بيساعدونه اذا هالشيء بيزعل عمي ابو فيصل منهم
نواف: لأن سيف يحبه ماراح يتركه ولأن اخر شيء يهتم له سيف رضا اهله
معاذ: لااا غلطان ياحبيبي سيف رفضه عشان مايزعل اهله مو لأنه مصدق الي صاير
ضرب نواف طبلون السيارة: انا ماراح اجلس مكتوف الايدي على احتمالات ، اي شيء عندي توقع انه بيساعدنا ماراح اتردد اني اسويه
خزه معاذ: انت بتتحمل كامل العواقب اذا صار شيء ، يلا انزل
نزل معاذ وأتصل على سيف
رد سيف: هلا حبيبي
معاذ: عمي فاضي؟
سيف: ايه امرني
معاذ: بنتقهوى عندك انا ونواف
سيف: ابد حياكم بأي وقت
معاذ بأحراج: احنا برا
سيف: يلا الحين افتح
قام سيف وهو منزعج كان متوقع بيقنعونه يوافق على خطبة بتال وأصيل ، لبس تيشيرته ونزل يفتح لهم الباب وهو نازل قال للعاملة تجهز لهم قهوة
فتح الباب واستقبلهم بكل حفاااوة: هلا والله زارتنا البركه
سلم عليه نواف: تسلم والله
سيف: تفضلوا حياكم
دخلوا للصالة و الى وصول القهوة كان سيف يرحب فيهم ويتطمن على احوالهم
سيف: والله زين اذا دوامك معطينك فرصة الدراسة
نواف: اكيد مو متاحه لي دايمًا بس احااول وتمر علي ايام ضغط والله
مد له سيف فنجان القهوة: مافيه شيء يجي بالهين وانا عمك الي ماأكل هواء بحياته ماراح يعيش
نواف: صادق والله
جت عين نواف على معاذ الي يناظره بعصبية ينتظره يتكلم وانتبه لهم سيف
سيف: وش فيكم عسى ماشر
تنحنح نواف: الشر مايجيك عمي بس جاايينك بنكلمك بموضوع
قاطعهم دخول أصيل للبيت وناظرتهم بأستغراب
ناظر سيف ساعته: غريبه متأخره بابا فيك شيء
اصيل بهدوء ولازالت نظره الاستغراب على وجهها: لا بس كنت اتغدى مع شهد
سيف: بالعافيه
طلعت اصيل لغرفتها وهي قلبها ورااها تبي تعرف وش صار
التفت سيف لنواف الي فز قلبه لأسم شهد وتلعثم
سيف: ايه اسلم؟
نواف: تعرف ان بتال مسجون
انقلبت ملامح سيف وانصدم: لا عاد!
نواف: اي والله ، وأكيد انه مظلوم بتال اخوي مو صديقي وأنا أعرفه ماتطلع منه هالتصرفات
سيف: اي تصرفات ليه مسجون؟
نواف: متهم بتزوير اوراق وشيكات يعني اتوقع انها داخله بغسيل اموال
سيف انفعل وبان الخوف عليه: من متى وكيف انمسك ولييه ماأحد يدري
معاذ: هو مايبي احد يعرف حتى انت لو يدري اننا جايينك بيقلب الدنيا علينا
نواف: فتشوا مكتبه ولقوها من يومين
سيف: وش يعني مايبي احد يدري مو على كيفه لازم احد يتصرف وابوه ضروري يعرف
معاذ: تكفى ياعمي فكنا من وجع الراس بنحاول نحل الموضوع لحالنا بدون مايكبر واصلًا بتال متوقع ابوه الي مبلغ عليه وساجنه لأنه شاك فيه
سيف بعصبية: وش هالكلام اذا بتال مهبول انت تنهبل معاه؟ منصور مايسويها
نواف: انا ماعندي اي شكوك وتوقعات بس مجنني كيف هالسالفتين طاحت عليه بوقت واحد؟
سكت سيف للحظات يفكر: احد ناويه شر ، معاذ تتذكر السوالف الي صارت بعد حادث باسل؟ الكاميرات كم مره وصدمة سيارة اصيل وشكوكنا حول حادث باسل بكبره
معاذ: فكرت فيها بس ماوصلت لشيء الا انها ممكن تكون صدف
هز سيف رأسه ينفي كلام معاذ: مو صدفه ولازم نتحرك قبل يلحق الموضوع احد اولهم ان بتال تثبت عليه التهم
معاذ: يعني تعرف احد يطلعه؟
سيف: ابوه ماراح يتركه
فز نواف: تكفى لا مانبييه يدري
عصب سيف: مو قراركم انكم تخفون شيء كذا عن ابوه!
معاذ: عمي ترانا جيناك من بين الكل لأننا واثقين فيك يرحم اهلك لاتورطنا وتخلينا نندم ، انت لحالك تقدر تطلعه بدون مايعرف عمي منصور
خزه سيف: تتوقع عامر وش رايه بكلامك؟
معاذ بانفعال: ابوي ماراح يرضيه كلامي بكل الاحوال بس اذا ودك تساعدنا ساعدنا بدون مايعرف احد او اتركنا نحاول نتصرف
تنهد سيف بقل صبر: عطوني يومين ويكون طالع بأذن الله بسوي كل الي بيدي
نواف: والله دريت اننا مابنرجع خايبين من عندك هذا العشم فيك
حس سيف بمسؤولية كلامه: بس ماأوعدكم .. انا بسوي كل الي اقدر اسويه
معاذ: مهما صار ماقصرت ولا بتقصر يدك ممدوده لنا دايمًا
ابتسم سيف: انا اخوكم قبل اصيرعمكم يامعاذ وماراح اشوفكم متضررين وأسكت
معاذ: اعرف والله مابتقصر معنا ابد
سيف: وينه بتال؟ ابي اقواله لازم افهم منه
نواف: فيصل فهم منه كل شيء لو نكلم فيصل افضل لانه ماراح يرضى يتكلم لك
سكت نواف بتردد وكمل كلامه: تدري انه ماخذ موقف منك
تنهد سيف: ادري ، خلاص بكلم فيصل وأشوف وش اقدر أسوي
وقف نواف: ماقصرت والله
سيف: اجلس وين رايح بتتغدى هنا
معاذ: كثر الله خيرك والله عندنا مشوار لازم نلحق عليه
سيف: على خير الله ييسر لكم
طلعوا للسيارة وتنهد نواف براحه: قلت لك على الاقل نسوي شيء يريح ضميرنا
معاذ: ان شاءالله يطلع بيده شيء ومايضطر يقول لعمي
شغل نواف السيارة: وين مشوارك
معاذ:اي مشوار؟
ناظره نواف باستغراب: انت تقول عندك مشوار بتلحق عليه
ضحك معاذ: ماعندي شيء بس ماأبي نتغدى عندهم
قبل يحرك نواف وصلته رسالة اصيل: موضوعكم يخص بتال؟
ناظره نواف: اصيل تسألني موضوعنا يخص بتال
ماجاز لمعاذ ان نواف يتكلم مع بنت عمه بس ماعلق احترامًا للظروف: لاتقول لها تراها قريبه من اخت بتال
نواف: انا قلت لها انه مسجون وخلصت بس ماأدري اقول لها ان الموضوع كبير يحتاج تدخلات ولا اسكت؟ ماأدري بتال وش يبيها تعرف
معاذ: تصدق؟ عمي ماراح يخبي عنها لو سألته ف قول لها لاتسأله
رد عليها نواف: ابوك عندك واسطه تقدر تطلعه وكلمناه عشان يحاول
اصيل: فيصل ماقدر؟ يعني الموضوع كبير
همس نواف: بتال صادق مايقدر عليها الا ربها
سحب معاذ الجوال من يده وكتب لها: مافيه شيء بس فيصل بيتضرر لو طلعه اما ابوك يقدر بسهوله
رجع له الجوال وقال: خلاص هذي معلومات كافيه لاترد خلينا نروح نشوف لو نقدر ندخل على بتال
نواف: ايه سجن ابوي متى مارحت ادخل
معاذ: اجل بشوف فيصل متى ماراح نروح معاه عشان يدخلنا
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
