طلعت اصيل جلست على جوالها ومهره بقت داخل
ليان بهمس: وش فيك انتي بعد!
هزت اصيل راسها بنفي بدون رد لأنها لو تكلمت بكت
تركتها ليان براحتها
زينه: بطلب ماتشا احد يبي؟
اصيل بملامح جامده وبدون ماتناظر: الزقوم اطعم
ضحكوا على ردها وشتايمها حتى وهي باكيه
زينه: حراام عليك عطيها فرصه
قفلت اصيل جوالها واخذت نفس: من وين بتطلبين ابي قهوة مصدعه
جت مهره وجلست: بتطلبون قهوة؟ من وين
زينه: وش رايكم نطلب من فيو؟
ليان: ايوه حلوه الماتشا عندهم
اخذت اصيل سماعتها ووقفت: اطلبي لي V60 بروح امشي
سحبتها مهره جلستها وهمست لها: كلمت بتال
ناظرتها اصيل بأستغراب
مهره: اول ماتكلمت عصب وقال اذا بتتكلمين بهذا الموضوع لاتكلميني
اصيل: اي موضوع؟
ناظرت مهره عيون اصيل الحمراء من البكي: هوشتكم
بانت ملامح عدم الرضا على وجه اصيل: ليه كلمتيه؟ صغرت قدامه وحاولت بما فيه الكفايه اذا هو مب شايفني شيء الله لايرده وخلاص محاولاتي لرضاه بتووقف هنا
قامت اصيل لجهة الخيول تبي تهرب من اي ذكر لأسمه ، شافت معاذ واقف بالمكان ودخلت الأسطبل عشان تكون لحالها لكن ماافي مهرب رجعت ووقفت قدام الأصيل
بعد دقايق دخل معاذ وراها وسند كتفه لباب الأسطبل يناظر خيول بتال الي وقفت اصيل عندها
معاذ بهدوء وهو يناظر بعيد: اسف اذا كان هذا السؤال راح يضايقك او يحسسك بعدم أريحية لكني مضطر اسأل، وش اللي صار بينك وبين بتال؟
أصيل وهي تمسح على الخيل: وش الفايده من أني اعلمك؟ اشبع فضولك بس؟
معاذ بإستنكار: فضول؟ تتوقعين ان هذا الدافع الوحيد اللي بيخليني اسألك؟
أصيل: ماأشوف انك تملك أسباب اخرى
معاذ: بتال نزل من السيارة ودخل المكان اللي انطرد منه بس عشانك انتي، لانك الشيء الوحيد اللي خايف يفقده وكنتي انتي الشيء الوحيد اللي قادر يردعه عن قرار السفر وطلع من عندك فاقد كل شيء يخليه يتمسك بنجد وهواها، كان وده يتركها باللحظة نفسها ولا يجلس حتى ثواني
أصيل وهي تحاول تخفي دموعها: لو كان خايف يفقدني ما جفاني بهذي الطريقة وش ما كان الموضوع اللي بيننا، ماهو مستحق هالقسوة وهالهجر
معاذ بقلة حيلة: علميني وش صاير ممكن اقدر اساعدك! احتاج افهم عشان اقدر اتصرف
أصيل: صدقني حتى لو علمتك ماراح يتغير شيء لا أنت بتستفيد ولا بتال بيرجع، هذا النقاش عقيم وغريب انك تحسب انه ممكن يوصلنا لمكان او لحل
معاذ: اصيل انا أترجااك تعطيني لو طرف خيط من السالفة ! جالس اموت وانا اشوف بتال كذا ولا قادر اسوي شيء افهميني يمكن اقدر ارجعه!
أصيل: صدقني ماكنت سبب لروحته ولا بكون سبب لرجعته هذا كل الي اقدر اقوله لك وموضوعنا شخصي جددًا ولا اي طرف قادر يمد يد العون فيه
معاذ: مايهمني وش صاير بينكم قد مايهمني ان بتال يرجع وأكيد الي بينكم سبب فارق معاه
سندت اصيل ظهرها للجدار وناظرته بعيون مليااانه دموع: الشيء الوحيد الي ممكن يفرق معاك اني أحتمال ماأكون هنا بعد فتره ، تقدر تستخدم هذا الشيء وترجعه لو كنت تشوفني سبب
ناظرها معاذ لأول مره ورغم انها كسرت خاطره كثيير الا أنه ماقدر يتعاطف معها بشكل واضح لأنها احد اسباب غياب بتال ولأن بتال يحبها: رفضك انك تجاوبين سبب كافي يحملك كل الأسباب انا جالس اشوف الخوف بعيونك من الجواب
مهره من وراه: وانا جالسه أشوف الجُبن بعيونك
التفت لها معاذ بصدمه وقبل يتكلم قاطعته بحده وعينها بعينه: انا منهاره من الخطبه وشايله همك ومتضايقه عليك بالنهاية انت هنا تدور اجابات بعيونها الخايفه؟
اصيل بهدوء وبدون ماتتحرك من مكانها: ليه خلصوا العالم عشان نتكلم انا ومعاذ بعاطفه؟ جالسين نتناقش بموضوع بتال
مسك معاذ يد مهره وناظر عيونها بحده: اسمعي مني لو مرره وحده بس ولاتتسرعين وتحكمين من راسك
دفت مهره يده وقالت بنفس الحده وعيونها دموع: طفشت من كذبك! خليك رجل لو مره وأثبت لي ان احكامي عليك غلط
قبل يتكلم مشت وتركته حاول يلحق وراها ويتكلم معها لكن دفته بشكل أعنف وكملت طريقها
بينما وقفت اصيل مكانها تراقب الموقف بحسرره لأن حتى مهره صارت تحكم عليها زيهم ، تجاهلت كل الي صاير وراحت لنهاااية المزرعة شبكت سماعاتها وعاشت انهياراتها لحالها وحست ب لوعة الوحده والفقد والخوف بلحظة وحده
مهره طلعت للغرفه بككت وهي حاسه بطعنه من معاذ وأصيل الغيره اعمتها عن كلل شيء الى ان نامت
بينما معاذ طلع برا المزرعة وتوجه لبيت نواف وهو حاس بالدنيا كلها خااانقته
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
