بعد العشاء راحوا الكبار لبيوتهم باستنثاء هند وسيف ومريم وجلسوا مع البنات بالخيمة .. وأتصل نواف على بتال يعزم العيال
هند: ليييه وش هالكئابه كلها لعبة
اصيل تضحك من الورطه: لا عمه اسمحي لي ماأجلس على كرسي اعتراف
هند: لانك مو قده، ميين يقدر؟
سيف: ليه مو انتي؟
هند تورطت: ليه مو انت؟
سيف بضحكة: اذا اعرست امي
اصيل: زواج جدتي على يدي اذا بتجلس على الكرسي
سيف: افااا حتى انتي ماتعرفيني وتبين تكتشفيني؟ يلا بجلس انا
صرخوا البنات تعزيز لسيف
اول ماجلس سيف على الكرسي خزته اصيل بمزح: هل يوجد حب في قلب بابا؟
سيف بضحكة: قلب بابا غير موجود سرقتيه طال عمرك
ناظرت مريم بعدم رضا وانتبه لها سيف لكن ماعلق
هند: وش سر هذي القصيدة الي فجرتها اليوم؟
سكتوا البنات بفشله مره ثانيه وخزوا هند لانها رجعت فتحت الموضوع
سيف ضحك: مافي اسرار هذا ذوقي بالشعر فقط
ليان: عمي صارحنا بقصص حب المراهقه
سيف ناظر مريم وابتسم: نخاف ام العيال مايعجبها الموضوع
مريم ابتسمت: لا شدعوه مايهمني الماضي لانه يبقى ماضي
خزتها اصيل تحت انظار الجميييع الي توجهت لها بعدين وجهت انظارها لأبوها وقالت بابتسامة مستفززه: اي بليز بابا تكلم لنا عن علاقات مراهقتك، لولا الماضي ماوصلت للي انت فيه الحين ومالحب الا للحبيب الاول
انقلبت ملامح مريم وعصببت من اصيل مهما حاولت تخفي هالشيء
حاولت هند ترقع التوتر الي صار: يوووه سيف كان فارس الاحلام بزمانه، كان كاتب رقمه على سيارته ويدووور عند كل مجمع
ضحك سيف بقوه: كانت لكزس حلم كل شاب .. اما حلم البنات الي راكب السيارة
انتصار: اوووف يالثقه
هند ابتسمت وهي تتذكر: كان يرررفض السواق ياخذني من المدرسة لازم هو وصدق كان حديث البنات وقتهاا
سيف بمزح: اقول عيب استحي على وجهك وش كان حديث البنات؟ للحين حديثهم
اصيل: بابا ارجوك شكلك تمر بأزمة منتصف العمر وبتصير شوقر دادي استرنا
ضحكوا البنات كلهم
هند: يوه سيف مره لايق عليك تكون شوقر دادي
لين: اييه عمي كذا كشوخي وشعرك فيه كم شيبه
زينه: ناقصك جدول بالنخيل مول ومجمع غرناطه بس
نجد: لااا حرام عليك الي بالنخيل شيبان خالي ارقى
سيف خزهم: خلصتوا جدول علي؟
هند بتسليك: تقدر تقول، يلا دور احد غيرك
عند العيال في شقة نواف كانو مازن ومعاذ يلعبون بلايستيشن
راح نواف للمطبخ يسوي قهوة ثانيه وبعد لحظات لحقه بتال يسولفون
نواف: ماكلمت ابوك؟
بتال: على وش
نواف وهو يشتغل مايناظره: انك بتخطب
بتال: لا باقي اصيل تقول تحتاج وقت
نواف: ايه عشان كذا قلت لك تكلمها عشان ماتنحط بموقف مع اهلك
سند بتال ظهره للدولاب: انا اصلًا انحطيت بموقف مع امي الي رافضه وتقول انها ماتناسبني
نواف: يمكن امك صادقه ومعها حق من ناحية لكن بشكل عام هذي حياتك انت الي تقررها بس بدون ماتزعل امك عاد
بتال: والله ماادري كيف اتعامل بالموضوع بدون زعل امي
نواف بتردد: بقول لك شيء
بتال: والله اني قايل من امس مانت بعاجبني وش فيك
ضحك نواف ووقف عند القهوة: انت تعرف اني شخص كل حياتي وحيد ماعندي غير انتوا وكم صديق اخر، مالي خلق لعب ومشاكل ووجع راس
ناظره بتال بأهتمام
نواف بتردد وهو منحررج من بتال: شهد عاجبتني بس ماتجرأت اطلبها شيء اتواصل معها، اذا تعرف ان اهلها بعدين ماراح يرفضوني بسبب حياتي ابيك توصلني لها
ضحك بتال: والله اني قااايل
نواف عصب: لاتشغلني بتعطيني شيء لها ولالا؟
بتال بابتسامه: ابشر بكلم لك اصيل، بعدين كيف تجاوزت كل خطوات العلاقة وفكرت برضا ورفض اهلها؟
نواف تنهد: عشان اوفر على نفسي عناء ماابي بعد ماتاخذ العلاقة مجراها ونتعلق ببعض اهلها يرفضوني، محد يبي يعطي بنته لواحد مقطوع يابتال
طبطب بتال على كتفه: والله اننا اخوانك واهلي اهلك وانك ماتخطب سواء شهد او غيرها الا وكلنا معاك
ابتسم نواف: سند وعزوه والله
بتال: عندي رقمها بس بقول لأصيل اول اكيد مايجوز لها اني اعطي رقمها احد
اخذ نواف القهوة: ابد حقك
طلعوا للصالة وارسل بتال لأصيل يقول لها عن كلام نواف
لما مسكت جوالها ضحكت بصدمه من كلامه وارسلت لشهد توريها رسالته
بعد لحظات قالت شهد: لا ارجوك مالي خلق ارجع لدوامة العلاقات مره ثانيه
اصيل كانت عارفه ان شهد باقي واقفه عند موضوع باسل وحاولت تقنعها عشان تطلعها منه وبعد محاولاات من اصيل تقنعها ان نواف شخص هادي ونظيف وكويس وافقت شهد
ردت اصيل لنواف: وافقت، جمعنا راسين بالحلال
ضحك بتال لما قرأ رسالتها: عقبال راسي وراسك
اصيل: قول له لايزعل صاحبتي بس ترا انا الي بنتقم منك لو زعلها
بتال: يامرحبا بجروحك والله
ناظر بتال العيال لاهيين باللعب وقال بصوت مسموع لنواف بس: انت ناوي تخطبها قريب يعني؟
نواف: لاا لاتوصل فكرتي غلط، بتعرف عليها وناخذ وقتنا اذا نناسب بعض اكيد مابي اكمل عمري كذا لحالي
بتال: انا برسل لك رقمها وانت تفاهم معها بكيفك
فاز مازن وصرخ بوجه معاذ: الللقم
خزه معاذ: انا الي سمحت لك تفوز
مازن وقف وهو يضحك: اييه هين
بتال: مافيكم نوم؟ انا نعست ووراي دوام
نواف ناظر ساعة جواله: تستهبل؟ بدري
بتال ناظره يحاول يذكره بشهد: ماعندك شيء ودك تسويه؟
ضحك نواف: الوقت مو مناسب
وقف بتال: انا بروح انام وانتوا بكيفكم
نواف: لاتروحون ماراح انام قبل الفجر دوامي متأخر
معاذ ناظر بتال: خلاص روح واحنا بنبقى
وقف بتال ياخذ اغراضه: تصبحون على خير
الكل: وأنت من اهله
نزل لسيارته وتوجه للبيت وهو نعسااان ، دخل البيت وعقد حواجبه بعصبية من صوت الاغاني المرتفع جددًا بوقت متأخر من الليل وتوجه للخيمه بيهاوش
لكن اول ماشاف اصيل ترقص شرقي بردت كلل ملامح العصبية بوجهه ووقف منبههرر بكلل تفاصيلها .. رقصها شعرها حدة ملامحها، ونحف خصرها الي فاتنه من زمااان
بعد ماأبهرته وخلصت الأغنية قال للبنات من برا: لاترفعون الصوت عيب حولنا جيران
مهره عقدت حواجبها: وش فيه مايهاوش؟ مين قرأ عليه
ليان بضحكه: سبحان الي يغير ومايتغير
طلع لغرفته انسدح بسريره وماااكان قادر يطلعها من تفكيره، كانت اصيل مثيره بالنسبة له من اول نظره لكن هالمره كانت مثيره بشكل استثنائي .. بشكل لعب بكل حواسه وخلاه مايفكر بغيرها
فتح جواله وكتب لها: كل مره خصرك يميل فيها، يميييل قلبي معاه
فتحت اصيل حزام الرقص رمته على ليان وجلست بتعب فتحت جوالها وشافت رسالته، توردت ملامحها من الخجل ورغم قسى برد نجد .. حست بالحر وردت: خلي قلبك يمييييل الى ان مايبقى بيده الا حبي ومادون ذلك هيّن ومقدور عليه
ضحك بتال وقفل جواله يحاول ينام
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
