في طريق البيت معاذ يسوق ويسمع اغاني وبتال فاتح تويتر شاف تغريده لأصيل " الليالي فرقتنا وان قربنا ابعدتنا وان بغيت الصدق هذي مشكلتنا "
سكت شوي يفكر بقصدها وقفل جواله سرح شوي الى ان وصلوا البيت
معاذ: ياارب انام بعد القهوة الي شربتها
بتال: عندي منوم تبي؟
معاذ: انا ماقدرت انام كلمتك
قبل يدخلون استغربوا ان انوار الخيمه شغاله وريحة حطب وفيها اصوات .. تنحنحوا ودخلوا وكانوا البنات وسيف ومريم وهند سهرانين بالخيمه
معاذ: السلام عليكم
الكل رد السلام
هند: جيتو بوقتكم تعالوا الجلسه حلوة
طاحت عين بتال على اصيل كانت جدًا شاحبه وتعبانه للحد الي يخلي بتال يفكر معقول تقصده وتحتاجه حولها الحين؟
معاذ: انا بنام والله وراي دوام
بتال كان صعب عليه يجلس مع سيف جلسات جانبيه باقي عالق عند موقف الصورة: وقت ثاني ان شاءالله
هند بمزح: يارجال انطم وتعال لاتتغلى محد فاضي لك
ضحك بتال: عمه تراك فاصله علي اليوم
هند: تعال والله اني مشتاقه لك
كسر سيف الفجوه بعد ماشاف عدم ارتياح بتال: صادقه هند وش وراك تعال أسهر
كانت اصيل تتصدد عن وجهه قد ماتقدر ولا طايقه تشوفه هو ولين بجلسه وحده
بينما كل البنات انظارهم على لين لان السهرة صغييره والحواجز بالكلام تقل بهذا النوع من السهرات
ابتسم بتال ودخل عشان سيف وهند جلس عند النار يسمع سواليفهم الي اغلبها مرعبه وهو هاادي سرحان
هند ناظرت بتال: اذا خايف أعترف لاتسكت كذا
ضحك بتال: ماتشوفيني ارجف؟
هند: سرحان ب ايش؟
بتال بابتسامه: قصيده تدور ببالي من اليوم
سيف: اشتقت لسهرات القصايد
مريم: سيف انت بالذات مانبيك تقول لنا قصايدك
ضحكوا البنات لان معروف قصائد سيف جرييئه
هند: بتال وش القصيده الي تدور ببالك؟
مد يدينه قدام لهب النار يدفيها وقال وهو بنفس سرحانه: هي كم بيت من قصيدة لخالد الفيصل قال فيها
لاتقول ان الليالي فرقتنا لاتقول ظروفنا عيّت علينا
الليالي يوم ودك جمعتنا يوم ودك كل شيٍ في يدينا
ياسقى الله ليلةٍ بك عرفتنا في شعيب شهار عن غيرك سلينا
كل كلمة يقولها كان وقعها قوي على قلب اصيل الي توسعت عيونها من جرأته وهو جاي يرد عليها وسط العائلة وقدام ابوها!
رغم ان هند ماهي فاهمه الموضوع لكنها حست ان بتال يبي يوصل رسالة لأصيل وناظرت سيف على طول تبي تتأكد هو حس بشيء او لا لكن اتضحت لها ملامح جامده ماتأثرت بالقصيدة وتطمنت شوي: هواجييس وانا عمتك قول لنا قصايد بعد
ضحك بتال ووقف وقال بتسليكه المعتاد: بكره اذا شبعت نوم ان شاءالله
كانت لين تلعب بغصن طويل تحط طرفه بالنار ، طاح رماده عليها وأحرقها شهقت وفزت بسرعه
التفت بتال بخوف: بسم الله وش فيك؟
سيف: بسم الله عليك تعورتي؟
تلخبطت لين من سؤال بتال وضحكت: لا ماعليكم بس لسعه
هنا عيون اصيل كانت شراار من غيرتها شافت فزة بتال لها لما احترقت وتأكدت كل الأجابات الي في بالها
ابتسم سيف وقال بمزح: لابغيت تعرف الملقوف حطه عند النار
ضحكت هند: سيف حرام عليك البنت محروقه وتعطي عليها امثال
لين بضحكه: عمميي الله يسامحك والله بيمسكونها علي
مهره: والله مايفكك مني الا ربك ياملقوفه
طلع بتال من الخيمه متوجه لغرفته وأرتسمت على وجهه ابتسامة رضا بعد رده على اصيل
أنتهت ليلة سعيدة على الأغلب بعد ماتوجهوا لبيوتهم ينامون
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
