صباح يوم جديد
توجه فيصل لمجلس جده وجدته بكل حماس يسلم عليكم وجلس يتقهوى عندهم: ماودكم نطلّع عمي سيف للمزرعه يغير جو؟
الجد: والله انك صادق ودي نروح نجلس هناك يومين قبل نهاية الاجازه
الجده: خلاص يافيصل انت بلغهم اننا بكره طالعين لحد يرتبط بشغل واستلموا التجهيزات بينكم
فيصل: سمّي ياجده
كتب لهم فيصل بالقروب:
السلام عليكم العائلة العزيزه بناء على رأي جدي وجدتي بكره بأذن الله متجهين لمزرعة الدرعية .. الجده اصدرت قرار ممنوع احد يرتبط بشغل وقالت قسموا التجهيزات بينكم اتمنى الكل يتفاعل نبي طلعه جاااامده لعيون عمي سيف
تفاعل الجميع مابين مُعزز وتقسيم التجهيزات بينهم
في بيت ابو معاذ
ام معاذ: طلعوا ملابس ثقيله شوي اكيد يبرد الجو بالّليل
ليان: يمه ترانا بالرياض عن اي برد تتكلمين
معاذ: اي والله حر هالايام
ابو معاذ: لا اسمعوا كلام امكم قلنا الجو بالليل بارد
لين: يبه وش فيك مو بالمود اليوم؟
ابو معاذ: اتركوني مع معاذ شوي
طلعو كلهم ومعاذ توتر وخاف وهو مو مسوي شيء
ابو معاذ: وش سبب هوشة بتال وعبدالعزيز امس؟
معاذ توتر زياده: تعرفهم يبه عبدالعزيز مستفز وبتال يعصب بسرعه
ابو معاذ: وش الي سواه عبدالعزيز عشان يستفز بتال كذا؟
معاذ: والله يبه كنت اسولف مع نواف وهم يسولفون سوا وتهاوشوا فجأه
ابو معاذ بنظره مشككه: انا قلبي مو مريحني لكل الي جالس يصير وبحذرك قبل الكل، لو اسمع يامعاذ انك متمشكل او مسوي اي سالفه ياويلك مني وحذر بتال يعقل ولا ترا بتنقطع رجلك عنه
معاذ: سم طال عمرك
—
صحت من النوم بثقل ناظرت الغرفه وزفرت بضيق .. يوم ثاني بنفس المكان الغير مريح، دخلت تاخذ شاور طوّلت فيه تتمنى يغسلها من قذارة لمسات عبدالعزيز بس المشكلة وش ينظفها من روحها؟
طلعت من دورة المياة لبست وتبخرت ونزلت شافت ابوها بالصاله يتقهوى وجلست عنده
اصيل: بابا افطرت؟
سيف الي مو اقل من بنته ضيقه: لا حبيبتي مالي نفس بتقهوى انتي افطري
اصيل قربت تبخره: مالي نفس انا بعد
سيف: كيف طلعتك امس انبسطتي؟
اصيل تذكرت الي صار وقلب وجهها: اي الحمدلله شهد مره تجنن بالواقع كويس لقيت لي صديقه هنا
سيف ابتسم: اشوفك نمتي امس قبل تسولفين لي عن يومك مو عادتك
اصيل توترت: كنت ميته نوم عشان الدواء الي اخذته ينوم
سيف: طيب ترا بكره الكل بيطلع للمزرعه ناقصك شيء قبل الطلعه؟
اصيل: لا لأني ماراح اروح
سيف: ليه؟
اصيل: لا اهلك بينبسطون فيني ولا انا بنبسط معهم اروح وانكد علينا كلنا ليه؟
سيف عدل جلسته وقرب لها: مو صحيح ي بابا البنات يبونك امس مهره قالت لي تبي رقمك وتبي تتقرب لك اكثر اكيد مرتاحين لك
اصيل بنبره بدت تتحول للبكاء: بابا ارجوك لاتضغط علي مابي ارجع اشوفهم واجلس معهم
سيف استغرب رفضها لهذي الدرجة: خلاص حبيبتي الي يريحك ماراح نروح
اصيل: ليه انت ماتروح؟
سيف: تبين ارتاح يومين بمكان بعيد وانتِ لحالك؟ مستحيل
اصيل: ماعليك بكون كويسه وش بيصير يعني؟
سيف: قلت مستحيل اتركك لحالك خلاص انتهى النقاش
حاولت اصيل تفكر بطريقة تقنع ابوها فيها ولما يأست قالت بعد صمت: خلاص بنروح كلنا
سندت ظهرها للكنب وهي تفكر كيف بترجع تقابل عبدالعزيز مره ثانيه بدون ماتنفجر
YOU ARE READING
امطري ياخيبة كبار الهقاوي .. وارعديّ
Romanceمعاذ: انت متى بتيأس؟ خلاص يكفي عناد يكفي مشاكل العايله كلها تشيل همكم لا اجتمعتوا ابتسم بتال وقال: تدري خالد الفيصل وش يقول؟ أحب أعسف المهرة اللي تغلى وأحب أروض كل طرفٍ يموقي
