امطري ياخيبة كبار الهقاوي .. وارعديّ

٥٩

يامساء الخير ، ماذا لو قلت لكم اني مشتاااقه أكثر منكم؟
رجعت لكم بعد انقطاع شهور وياارب ان البارت يرضيكم❤️
قراءة ممتعه ياقمَراتي

ظهر اليوم الثاني صحى بتال من نومه وبقى بالسرير يستوعب أحداث امس الغير مرتب لها ابدًا ابتسم فتح جواله يبي يرسل لها في الواتس ولقاها مبلكته ، ضحك وأتصل عليها
ردت اصيل بصوت نايم: هلا
بتال: متى ناويه تفتحين البلوك يالمعقده
ضحكت اصيل: والله محد معقد غيرك ، تكلم زين عشان افتحه
ابتسم بتال: طيب يافزّة هالروح لاتحرمين محبوبك منك يكفيني سنين وشهور عشتها بدونك تبين تحرميني أكثر؟
اصيل: اذا كذا مابفتح البلوك ، برمي لك نفسي من الشباك
ضحك بتال بقوه: اييه وريني هذا الحب تعبت اتوجد عليك بلحالي ياأصيلي
حضنت اصيل دبدوبها وتنهدت: من زمان ماعندي سبب يخليني ابتسم اول ماأصحى
تنهد بتال: والله اني ناسي كيف اضحك بدونك اصلًا خليها على الله بس
اصيل: طيب اشتقت لك مره
بتال: وأنا مشتاق لك ، وش عندك الليلة؟
اصيل: بروح لخوالي
بتال: تراي باخذك المزرعة اذا رجعتي ، ابي ليلة ماأسمع فيها صوت غير صوتك ولا أشوف غيرك ولا أشم غير عطرك
اصيل: حاضر ، انا لك الليلة وكل يوم
ابتسم بتال: تتذكرين يوم اقول لك انك لي وترفضييين هذا التملّك؟ كل شيء صار يقول انك لي حتى انتي
اصيل: عرفت معنى اني اكون لك ، يعني كل شيء سويته بتال عشان انساك ولا قدرت! كل الأقدار كانت تحط هذي الحقيقة امام عيني
بتال: حتى انا اقول لك والله ماتكونين لغيري ياأصيل ولو كان هذا الموضوع حياة او موت والبُعد الي صار شيء ماراح أسمح انه يتكرر
اصيل: وانا اقول لك لاتسمح انه يتكرر
بتال: تطمني بتكونين في ذراي دايمًا ، قومي صحصحي وروحي لخوالك وأرجعي بدري بناخذ وقتنا سوا
ناظرت اصيل الساعة وكانت ٢ الظهر: اف .. تمام
بعد ماأنتهت المكالمة جلست اصيل بمكانها على السرير تناظر الغرفة تسترجع أحداث الأمس .. رفعت لحافها بتقوم وداهمتها ريحة بتال ابتسمت وقامت وهي مبسووطه دخلت تاخذ شاور
طلعت وأتصلت على رعد
رعد: اهلين حبيبتي
اصيل: اهلاا خالي كيف حالك
رعد: بخير وأنتي كيفك
اصيل: الحمدلله، بجيكم اليوم بس لاتتعنّى لي بجي بسيارتي
رعد: شدعوه مافيها عنوه بس الطريق بعيد عليك شوي
ضحكت اصيل: انت الي شدعوه تراي اسوق بالرياض كلها!
رعد: قولي لأبوك يجي معاك يتغدى عندنا
اصيل: جايين ضيوف الكل مشغول
رعد بأستغراب: عندكم؟ وليه انتي مو معهم
اصيل وهي تبخر شعرها: ماأعرفهم سمعت انهم اهل طليق عمه هند يعني ماتحمست اشوفهم
عقد رعد حواجبه: طليق هند!
اصيب بأستغراب: ايه!
ابتسم رعد: طيب مو مشكله ، تعالي بدري اجل وبطلب لنا غداء
اصيل: يلا اتجهز واطلع
وقفت قدام المرايا تتأمل كيف وجهها منوّر ومرتااح الى ان جات عيونها على الاثار الي على صدرها من بتال وشهقت: الملعووون!!
فتحت دولاب الميكب اخذت كوريكتر وكونسيلر حاولت تخفيهم وأخفتهم بشكل كبير ، حطت ميكب خفيف وبأسرع وقت لبست فستان وتعطرت وتركت شعرها مبلول ونزلت بعبايتها للسيارة: ببابباا
مريم: عند جدك
اصيل: اذا جا قولي له اني عند خوالي
مريم: تمام
باست اصيل غيث وطلعت من البيت متجهه لبيت خوالها