[Zawgyi]
ချစ်ခြင်းမေတ္တာဆိုတာ လှပပါတယ်။ အဲ့သလိုပါပဲ။ ထပ်တူကျသွားတဲ့ ချစ်မေတ္တာတွေကလည်း ပိုလို့တောင်လှပါတယ်။
ဂုတ်ထိပ်အောက်ထဲကနေ ခြေထောက်ဒဏ်ရာကြောင့် အပေါ်ပြန်မတက်နိုင်တော့တဲ့ စစ်မင်းကို နယ်ခြားစောင့်တပ်က တပ်သားတွေကကူညီပြီး pulley ဓာတ်လှေကားဖြင့်အပေါ်ကို တင်ပေးခဲ့သည်။ ဂုတ်ထိပ်တံတားဆီကနေ ကားရပ်ထားခဲ့သည့်နေရာက တော်တော်ဝေးနေတာကြောင့် ကိုစိုင်းမိုးနဲ့ ကိုစိုင်းခမ်းတို့က ထော်လာဂျီနဲ့ ကားရပ်ထားခဲ့ရာနေရာကို ပြန်လိုက်ပို့ခဲ့ကြသေးသည်။
ပြန်ရတော့မှာမလို့ ကိုစိုင်းမိုးနဲ့ ကိုစိုင်းခမ်းက မျက်နှာမကောင်းစွာနဲ့ သတိရနေကြမှာလို့ ပြောနေလိုက်သေးသည်။ တစ်ရက်တာလောက် ဆုံခဲ့ရပေမယ့် ခက်ခဲကြမ်းတမ်းတဲ့ ခရီးလမ်းကြောင်းတစ်လျှောက် အတူဖြတ်ကျော်ခဲ့ရသည်မလို့ အမှတ်တရတွေက များစွာရှိနေသည်။ နောင်ချိုကနေ ပြင်ဦးလွင်ကိုပြန်လာတော့ ဒဏ်ရာရထားသည့် စစ်မင်းခြေထောက်က သက်သာနေပြီဖြစ်ပေမယ့် နာနေသေးတာမလို့ ခပ်ဖြေးဖြေးသာမောင်းပြီး ပြန်လာခဲ့ကြသည်။ မနက်စာကတော့ ကိုစိုင်းမိုးနဲ့ ကိုစိုင်းခမ်းတို့ ထုပ်လာပေးတဲ့ ကောက်ညှင်းပေါင်းပူပူနဲ့ တို့ဟူးကြော် ကြွပ်ကြွပ်ရွရွလေးကို စားခဲ့ကြသည်။
" ကျွန်တော့်ကို ဘာလို့ အဲ့လောက်စိုက်ကြည့်နေတာလဲ Daniel "
" ချစ်လို့ ~ ကိုယ့် baby ကို အရမ်းချစ်လို့ ... ကိုယ်တကယ်မယုံသေးဘူးသိလား ... အခုလိုလေးလေ ကိုယ့် baby ရဲ့ လက်လေးကို ကိုင်ထားခွင့်ရတာ ... ရွှတ် "
ဆုပ်ကိုင်ထားသည့် စစ်မင်းရဲ့လက်တစ်ဖက်ကို Daniel က ဆွဲယူကာ နှာချောင်းချွန်ချွန်လေးနဲ့ ရွှတ်ခနဲ နမ်းလိုက်တဲ့ အပြုအမူလေးကြောင့် ကားမောင်းနေသည့် စစ်မင်းရဲ့ မျက်နှာက ရဲသွားသည်။ ဒီကပြားလေးက စကားမတတ်လို့သာ။ ပုံစံအမျိုးမျိုးနဲ့ ရင်ခုန်အောင်လုပ်နေတော့တာပဲ။
" ဗိုက်ဆာနေသေးလား Daniel ... မြို့တွင်းဈေးမှာတော့ ရှမ်းခေါက်ဆွဲဆိုင်တွေ ရှိမယ်ထင်တယ် "
" ဟင့်အင်း ... ခုနက လမ်းပြအစ်ကိုတွေ ပေးတဲ့ ကောက်ညှင်းပေါင်းနဲ့တင် ဗိုက်ပြည့်နေပြီ ... baby ထပ်စားချင်ရင် စားကြမယ်လေ "