ငါ့တပည့်တွေက ဘုရင်တွေ

အပိုင်း 22

အခန်း (၂၂) : မှော်နက်စီးကြောင်းတစ်ခု တစ်ဟုန်ထိုးစီးဆင်းခြင်း

ချင်းထျန်းနျန်သည် ဟုန်ရင်နှင့် ယဲ့ချိုးပိုင်တို့ကို ကြည့်လိုက်သည်။

ယဲ့ချိုးပိုင်၏ကျင့်ကြံရေးအဆင့်သည် ခရမ်းရောင်ဘုံဗိမာန်အဆင့်ကို ရောက်ရှိသွားပြီဖြစ်ကြောင်း အကြည့်တစ်ချက်မျှဖြင့်ပြောနိုင်ပေသည်။

သို့သော် ဟုန်ရင်၏ကျင့်ကြံရေးအဆင့်ကိုမူ သူ ထိုးထွင်းမသိမြင်နိုင်ချေ။

၎င်းကို ထိုးထွင်းသိမြင်နိုင်အောင်ကြိုးစားခြင်းသည် မြူခိုးများကိုဖောက်ထွင်းနေရသလိုဖြစ်နေလေရာ ချင်းထျန်းနျန်မှာ တိတ်တဆိတ်အံ့သြသွားရလေသည်။

ဒီတပည့်တွေကို ချန်ရှန်း ဘယ်ကသွားရှာလာတာလဲ။ သူတို့တွေအကုန်လုံးက လုံးဝကိုကြောက်ခမန်းလိလိဖြစ်နေရတာလဲ..

သူတစ်ကိုယ်တည်း တွေးတောနေမိသည်။

သို့သော်ငြား ထိုသို့တွေးမိတာလည်း မမှားပေ။

ချင်းထျန်းနျန်၏လက်ရှိကျင့်ကြံရေးအဆင့်နှင့်ဆိုလျှင် ဂျူနီယာတစ်ယောက်၏ကျင့်ကြံရေးအဆင့်ကို ထွင်းဖောက်ကြည့်ရှုရန်မှာ လွယ်ကူလွန်းလှသည်။

သို့သော်ငြား ဟုန်ရင်သည် ယခင်ဘဝက ဧကရီတစ်ပါးဖြစ်ခဲ့ဖူးသူပင်။

သို့ဖြစ်ရာ သူ(မ)မှာ ကျင့်ကြံရေးအဆင့်ကိုဖုံးကွယ်ထားနိုင်သည့်နည်းလမ်းမျိုး မရှိဘဲနေပါ့မလား။

ဟုန်ရင်သည် ကျင့်ကြံရေးအဆင့်ဖုံးကွယ်ရေးနည်းဗျူဟာရာချီခန့်ကို တစ်ခုနှင့်တစ်ခုမထပ်စေရဘဲ ထုတ်သုံးပြနိုင်သည်။

ဤသည်မှာ မဟာဧကရီတစ်ပါး၏အခြေခံစွမ်းအားပင်ဖြစ်သည်။

သို့သော် ထိုအရာသည် သူ(မ)ဆန္ဒရှိသမျှအရာအားလုံးကို ဆောင်ကြည်းပေးနိုင်သည့် လုချန်ရှန်းအပေါ်ကိုတော့ အလုပ်မဖြစ်ပေ။

သူပေးလာသမျှအရာများအားလုံးသည် သူ(မ)မှာမရှိသည့်အရာများဖြစ်ပြီး သူ(မ)လက်လှမ်းမမီနိုင်သည့် အဆင့်မြင့်အရာများဖြစ်သည်။

လုချန်ရှန်းလည်း သူ့ကိုကြည့်ကာမေးလိုက်၏။

"ဦးလေးချင်း ဘာကိစ္စရှိလို့လဲ"