Phantasmagoria (Wattys2018 Winner)

[31] In Which They Try to Convince the Others

EPISODE 31:
In Which They Try to Convince the Others

Umalis na si Muriel para maligo at ayusin ang sarili. Nang maiwan si Lotte roon kasama si Rivendyll ay binigay niya rito ang damit ni Hadi. Hindi na lang niya ito tinulungang magbihis dahil kahit na nasa anyong bata ito ngayon, si Rivendyll pa rin ito at nakakailang pa rin kung gagawin niya 'yon.

Bumaba siya sandali para maghanda ng agahan. Pagbalik niya sa kwarto nito ay nakabihis na ito. Suot na nito ang shirt, doublet, at pantalon ni Hadi. Kahit na bata ito ay ang galing pa rin nitong magdala ng damit. Lumingon ito sa kanya at ngumiti.

"Hindi ka na ba talaga nila makikilala niyan?" sabi ni Lotte at umiling ito. "Nandyan na ang tatay mo sa labas. Kayo ng bahala, sasabay na lang ako."

Pumunta na silang lahat sa kusina. At tulad ng inaasahan nila, ay hindi nga makapaniwala ang mga kapatid nito nang ipakilala ni Muriel ang 'anak' nito sa kanila.

Tulala namang napatingin ang lahat sa batang karga ni Muriel. Nakatayo lang si Lotte sa isang tabi. Habang ngumingiti naman sa mga ito ang bata kuno na si Rivendyll.

Si Finnley ang unang bumasag ng katahimikan. Hindi ito nagsalita. Sa halip, ay tumawa ito ng malakas, na sinundan naman ng pagtawa ng iba pang mga kapatid nito.

"Ang galing mo talaga 'tol," sabi ni Finnley. "Sa lahat ng mga biro mo, ito ang pinakanakakatawa. Muntik na kaming napaniwala."

Sumimangot naman si Muriel. Lahat ng mga kapatid nito ay tumatawa, maliban kay Heath na umiling lang at bumalik na sa pagkain. Nilingon ni Muriel si Lotte na hindi makapaniwala.

"Tingin niyo ba talaga nagbibiro ako?" sabi ni Muriel. "Anak ko nga 'to eh!"

Tumango-tango naman si Finnley. "Oo na, oo na. Sige, anak mo na 'yan. Kumain ka na. Gutom lang 'yan. Saka mamaya, ibalik mo na 'yang bata kung saan mo kinuha, kawawa naman."

Mas lalong naasar si Muriel.

"Grabe naman kayo! Bakit naman ako magpapanggap na may anak? Ano namang mapapala ko doon?" kumbinsi ni Muriel sa mga ito.

Nagkatinginan naman ang mga kapatid nito.

"Sabagay, bakit nga naman gagawin ni Kuya Muriel 'yon?" sabi ni Uno. "Baka naman totoo."

"Kita niyo," sabi ni Muriel. "Buti pa si Uno, mas matinong kausap kaysa sa inyong mga matatanda."

"Pero, Kuya Muriel, kung may anak ka na, paano nangyari 'yon?" sabi ni Uno.

Tumawa naman ng malakas si Finnley at hinampas pa ang mesa. Pati si Lewis ay napatakip sa mukha na tinatago ang sariling tawa. Pero si Uno ay genuinely puzzled talaga ang mukha.

"Anong ibig mong sabihin?" inis na sabi ni Muriel.

"'Yon na 'yon. Anong nangyari at nagkaroon ka ng anak?" sabi ni Uno.

"Alam mo, Uno," sabi ni Finnley na tinapik pa ang balikat ng binatilyo. "Alam ko namang teenager ka na at nagtataka ka sa mga bagay na ganoon. Hayaan mong ipaliwanag ko sa'yo—"

Tumikhim si Lewis at inawat si Finnley. "Tingin ko ang ibig sabihin ni Uno ay paano nagkaroon ng anak si Muriel nang hindi natin alam. Tama?"

Tumango naman si Uno.

Umiling-iling si Finnley. "Baka lasing siya noong nangyari 'yon."

Halos tampalin naman ni Lewis ang sariling mukha nang hindi ulit nakuha ni Finnley ang ibig nilang sabihin. Pati sila na nasa tabi lang ay hindi alam kung matatawa o mapapa-facepalm din kay Finnley.

"Tulad ng sinasabi ko, ang ibig sabihin niyon, ay—di bale na nga lang," naiiling na sabi ni Lewis. Nilingon nito si Muriel. "Anak mo ba talaga 'yan?"