[54] Hindi ko alam
Inaalay ko sa: mga tanong na sinasagot ng pamagat.
Araw-araw ay may sinasagot at iniiwasang sagutin na mga tanong
at may mga sagot na binibigkas ngunit minsan nama'y ibinubulong.
May mga tanong na makatutuklas sa kalahati ng iyong pagkatao
o ng tunay na nilalaman ng iyong mapaglarong isip at tusong puso.
Sa likod ng mga sagot sa katanunga'y mabibilang nga ba
kung ilan ang bulong ng isip at puso na siyang nagkatugma?
Maaaring ang kausap ay mapaniwala sa sagot ng kasinungalingan,
ngunit kailanman ang sarili ay hindi makakayang maisahan.
Ang katotohanan ngayo'y posible nang ipaikot-ikot
hanggang sa masanay na ang mga tao sa sagot na baluktot.
Nasisiyahan pa nga ang ilan sa kani-kanilang pagmamanipula
na nagiging dahilan para ang pagtakbo ng buhay ng iba ay maantala.
Nandiyan ang mga mungkahi na pansamantala raw na solusyon
na kalaunan ay magiging isa palang permanenteng lason,
makapangyarihang mga salita na galing raw sa mga henyo,
at isang huwad na sistemang siyang umiiral sa mundo.
Paulit-ulit na prosesong nagdudulot at magdudulot pa ng pagkahilo,
pagkalito, pananakit ng ulo, pagtaas ng kilay at pagkunot ng noo.
Kaya sasang-ayon o dededmahin na lahat para matapos lang,
o mag-iiwan na lang na makabuluhang sagot na: "Hindi ko alam."
March 1, 2016
Ako'y Tutula by Darloine
YOU ARE READING
Ako'y Tutula
PoetryKoleksiyon ng mga tulang bunga ng kalayaan kong magpahayag ng sariling opinyon at damdamin tungkol sa lahat ng nakikita, naririnig, nararamdaman, nalalasahan at naaamoy ko rito sa mundo. Ako'y tutula... -D. Cover by: "Kai" (ang babaeng neutral sa mu...